حتتقدم في اكتوبر.. جيتور T2 أهم عربية صيني تنزل مصر

تقدر تقول ان جيتور T2 هي أهم عربية صيني حتتقدم في مصر، وده لأنها حتعمل "Shift" كبير لوضع العربيات الصينية في السوق.

جيتور T2 حيقدمها الوكيل القصراوي جروب الشهر الجاي "أكتوبر" والمفترض ان تقديمها حيكون اسطوري لأنها مش عربية عادية.

احنا عارفين ان شيري القابضة ليها فرعين الأول شيري والتاني جيتور ، وكل علامة ليها ادارة مستقلة تماما وكمان بتدير علامات تانية او فرعية.

لحظة الكشف عن جيتور T2 اصابت الغيرة الشديدة كل المسؤولين عن فرع شيري، لأن العربية دي فيها أحدث ابتكارات في العالم كله ، وكمان تصميمها مبهر بمعنى الكلمة ، مهندس التصميم ألماني جاي من بورشة ، وهو اللّي صمم بورشة 918 سبايدر ، واستخدم شكل المربع في تفاصيل التصميم. ده غير ان شراكة شيري مع جاكوار لاندروفر ظهرت واضحة جدا في T2 ويمكن مهندس التصميم مال لشكل لاندروفر ديفيندر حبتين.

العربية فيها نظام XWD ، شغال دفع ثنائي وعند الحاجة دفع رباعي، فيها من التجهيزات كل ما تتخيله ، ومظومة أمان كاملة ، نظام صوتي من سوني، أوامر صوتية باللغة العربية ويمكن دي اول مرة عربية تنزل بيه في مصر.

المحرك 1.5 لتر توربو بقوة 181 حصان وعزم 290 نيوتن.متر وتسارع من الثبات لـ100 كيلومتر في 7.7 ثانية ، وناقل حركة اوتوماتيك من 7 سرعات "Duel Clatch" وجنوط 20 بوصة.ل

العربية سعرها بالتاكيد حيكون عالي، لانها بتغير زي ما قلنا مفهوم الجودة والكفاءة للعربيات الصيني، وحتفتح الباب لمنافسيها المباشرين زي تانك 300 انهم يتقدموا في مصر، وليها عربية منافسة بشكل مباشر نازلة مصر في شهر نوفمبر ح اكتب عليه بكرة.

العربية اتقدمت من فترة في الخليج وكانت تريند ، لكن بتنزل هناك بمحرك 2 لتر ، ينفع مع اللعب في الصحاري عندهم.