قصة ساوايست وجيتور.. مين اللّي باع ومين اللّي اشترى والموقف الحالي في مصر

مهم جدا انك تعرف ان الصين عبارة عن مقاطعات وكل مقاطعة ليها حاكم وحكومة، وليها استثمارات خاصة بيها بعيدا عن الحكومة المركزية.

شركة ساوايست كانت مملوكة 51% لشركة فوجيان موتور التابعة لحكومة مقاطعة فوجيان و25% لشركة ميتسوبيشي اليابان و24% لميتسوبيشي تايوان.

في نهاية 2020 بدأت متسوبيشي اليابان تتخارج من الشركة وباعت اسهمها لشركة فوجيان، وبنهاية 2022 تخارجت متسوبيشي تايوان وبقت اسهم الشركة مملوكة لشركة فوجيان بنسبة 100%..

هوب طلع قرار من الحكومة المركزية الصينية بتحديد حد أدنى لانتاج أي علامة سيارات في الصين "تمّن".. طبعا ساوايست مكانتش محققة الحد الأدنى، فحصل اتفاق بين مقاطعة فوجيان ومقاطعة أنهوي ان الأخيرة تضمن ان علامة ساوايست تكمل الحد الأدنى طبقا لقرار الحكومة المركزية وبعدها تملك مقاطعة أنهوي 80% من اسهم ساوايست ، مع الاحتفاظ بعلامة ساوايست وعدم إلغائها، وبالفعل تم الاتفاق.

مقاطعة أنهوي تمتلك مجموعة شيري القابضة كلها، فقررت ان ساوايست تبقى ضمن المجموعة وأسندت ادارتها لجناح جيتور.

جيتور قالت مفيش حل في الوقت البسيط الباقي غير اني انزل موديل من جيتور بعلامة ساوايست ، وبالفعل شالوا علامة جيتور منX70 وحطوا علامة ساوايست وسموا الموديل DX8 ، وتم بيع العربية في الصين وتحقيق الحد الأدنى من الانتاج، وطبعا شفنا العربية في مصر

شوية وبدأ انتاج S06 على نفس منصة جيتور داشينج ، وS07 نفس جيتور X70 و S09 بنفس منصة جيتور X90.

معنى كده ان جيتور مستفادش حاجة من وجود ساوايست؟

أكيد استفادت ، عربية ساوايست DX5، جيتور اخدتها وعملت عليها شوية تعديلات ونزلت باسم جيتور X50 ودي موجودة بالفعل وبتبيع في الصين.

خد بالك ان جيتور عندها سلسلة T الخاصة بيها، وغالبا دي حتكون خاصة بس بجيتور.

طب بالنسبة لمصر حيكون ايه الوضع؟

يبقى الوضع على ماهو عليه، في وكيل لعلامة جيتور ووكيل تاني لعلامة ساوايست ، وكل علامة حتنزل بموديلاتها والمنافسة تاخد مجراها.

بس كده ؟

لأ طبعا بس للحديث بقية