"ترخيصها ب12 الف جنيه".. أهم 7 معلومات عن نيسان اكس تريل

نيسان مصر كشفت عن اكس تريل الجديدة بتكنولوجيا الـe Power طبعا الخبر معروف من فترة وبمجرد الاعلان عنها تقريبا كل وسائل الاعلام المتخصصة والسوشيال ميديا كتبت تفاصيل كتير عنها.. بس هنا حتلاقي الأمر مختلف شوية.

الـe Power دي تكنولوجيا مسجلة وحصرية باسم نيسان ، عربية كهربا بيتم شحن البطارية باستمرار بواسطة محرك البنزين ، يعني غير قابلة للشحن الخارجي ، المحرك عبارة عن مولد طاقة، الطاقة دي تروح للانفرتر يحولها للبطارية ومنها للمحرك الكهربائي، يعني العربية مش بتمشي بمحرك البنزين نهائيا ، عشان كده خرجت من عباءة الهايبريد.

إقرأ أيضا للكاتب إسلام حويلة :

الأخ نائب رئيس جيتور .. هو جحا بتاع الحمار في منه صيني؟

لازم تعرف ان أهم نقطة في اكس تريل انها ياباني .. جاية من اليابان رأسا ، يعني مش حكاية Made In Nissan تخرج من أي مصنع نيسان في العالم، ودي انا بعتبرها النقطة الاهم ، لما تسوقها حتعرف الفرق. 

تاني نقطة مهمة سعر البطارية ، في نيسان اكس تريل سعر البطارية 75 ألف جنيه بس ،يعني بسعر فانوس أمامي كوري ، يعني التخوف من فكرة السيارات الكهربائية وان البطارية غالية جدا وسعرها 70% من سعر العربية مش موجود ، حتى لو انتهت صلاحيتها بعد 10 سنوات مثلا تقدر تجيب غيرها. مش تجيب عربية جديدة.

تالت نقطة سعر العربية ، الفئة الأعلى نازلة بـ2.5 مليون جنيه وفيها لغاية 3.5 مليون جنيه أوفر برايس، لأن مثلا سبورتاج وهي اكثر عربية بتبيع في مصر، وصلت لـ3 ملايين جنيه في الفئة الأعلى منها ، انت متخيل ياباني وكهربا و7 مقاعد ونيسان.. حتوصل كام؟

إقرأ أيضا للكاتب اسلام حويلة :

سوق السيارات في 2024 .. العدد في الغاطس

رابع نقطة توافر العربية ، دي حتبقى الاشكالية الأكبر، سيبك من المثاليات، محدش حيبقى قدامه يكسب ع الأقل 500 ألف جنيه وميعملش من بنها ، يعني العربية حاجة م الاثنين ، يا إما حتلف من تاجر لتاجر لتاجر وتوصل للمستهلك بـ3.5 بعد شهر مثلا ، يا إما حتدخل المخازن "تتسقع" ع الأقل لغاية ما تيجي دفعات تانية وبرضه حتوصل للمستهلك بـ3.5 .. يعني كده ميت وكده ميت على رأي كتكوت أبو الليل.

بالمناسبة.. تكنولوجيا الـePower ليها بند جمركي خاص بيها لوحدها في الجمارك صحيح مش زيرو جمارك لكن أزيد شوية وكمان تكلفة ترخيصها حوالي 12 ألف جنيه بس