في 2025 : ديزاير اللي عارفها تنساها.. وتيبو وتاليانت لو الاستيراد استمر

ما السوق مش بس تجميع محلي، في عربيات مستوردة منافسة جدا وبتبيع على حساب المحلي، ولا إيه؟

ده صحيح✔️، انا بدأت امس بس بالـCKD فبلاش استعجال، كله جاي، بس التوقيت⏱ مهم ،يعني انا ممكن اتكلم على "خناقة" ح تحصل في الـ SUV المحلي، بس عشان حتبدأ بعد رمضان في ابريل أجلتها شوية.. واديني مكمّل أهو

الفئة الاقتصادية 🚗: من 650 الى 850 ألف جنيه

طبعا انا بتكلم على اسعار اليوم، الاسعار دي حتزيد في يناير بسبب زيادة سعر الدولار💰، وتقريبا مفيش عربية مستوردة حتنزل تنافس في الفئة دي ، وأقصد بالتنافس انها تحقق مبيعات كبيرة، مش حبة عربيات والسلام.

♨️حتقولي سوزوكي ديزاير سعرها في المتناول وبتبيع كتير.. ده كان زمان ، سوزوكي وقفت انتاج موديل سياز نهائيا، وعملت جيل جديد من ديزاير بين الاثنين، يعني ديزاير اللي بتشوفها حاليا غير ديزاير الجديدة ، عربية أوسع واكبر، لكن سعرها حيعدي الـ900 ألف ده لو ملمسش المليون جنيه. سوزوكي اصلا رفعت اسعارها عالميا 5%.

يبقى مفيش غير فيات تيبو؟

👈تقصد المانيوال، كل شحنات فيات تيبو مانيوال اللّي جت خلصت، لأن سعرها مغري جدا حتى لو على حساب الاوتوماتيك ، وجودها في المنافسة يتوقف على عاملين، قدرة الوكيل على استمرارية الاستيراد ، والثاني استمرار الطلب على "المانيوال" ، لو حصل حتكون منافس مهم في الفئة دي.

⚡الفكرة اللي عايز أقولها ان المستورد بشكل عام مش حيقدر ينافس إلا لو الوكلا قدروا يستوردوا بشكل ثابت ومستمر، مثلا عندك رينو تاليانت رابع اكتر عربية سيدان مستوردة ترخيصا بعد كورولا ومرسيدس سي كلاس وام جي 5 ، برضه ممكن تكون منافس شرس ، بس اعتقادي ان الاستيراد حيكون محكوم ممكن مش بدرجة عام 2024 لكن برضه حيفضل محكوم وبالتالي المستورد مش حيقدر ينافس.