"تسقيع" العربيات والأوفربرايس و"العين الحمرا" لرينو ميجان

القاعدة الاساسية للاقتصاد هي العرض والطلب ، وأي محاولة لفرض اتجاه معين للأسعار أو ما يطلق عليه السيطرة على الأسعار هي محاولة بائسة وفاشلة وليس لها أي معنى ، طبعا في آليات لضبط السوق وكلها بتتمحور في قاعدة العرض والطلب.
تعالى نشوف سوق السيارات، حتلاقي ليه سعرين ،الرسمي وده مش حتلاقيه ، وفي السعر الفعلي (الأوفربرايس)، طب ليه موجود سعرين للسيارات، نرجع ونقول العرض والطلب، العرض شحيح في مقابل طلب كبير، وبالتالي حيفضل الاوفر برايس موجود.

إقرأ أيضا للكاتب إسلام حويلة :

"كده ميت وكده ميت" ..أهم 7 حاجات لازم تعرفها عن نيسان اكس تريل

يعني انت جبت التايهة؟
لا يا سيدي ، الفكرة مش في اوفربرايس الفكرة في تسقيع العربيات، زي حكاية تسقيع الاراضي كده بس الفترات بتبقى أقصر، يعني الموزع من دول ياخد حصته يبيع جزء منها للتجار بأوفر والتاجر يبيع بأوفر لتاجر تاني وهكذا لغاية ما توصل للزبون بسعر اكبر بكتير من السعر الرسمي، الجزء التاني بيدخل المخازن و"يتسّقع" شهرين تلاتة يكون السعر زاد مرتين تلاتة ، وبعدين مش يبيع للعميل لأ ده برضه بيبيع للتاجر، عشان كده لمّا تسمع أوفر مليون في عربيات لا هي BMW ولا هي أودي متستغربش.
اومال ايه قصة رينو ميجان دي؟
زيها زي بقية العربيات اللي بتدخل المخازن و"تتسقّع" ولو انت متابع السوق بشكل كويس حتلاقي الميجان اختفت من السوق في الربع الأخير من 2023،رغم انها في تقارير المبيعات هي الاكتر مبيعا في 2023 في فئتها، والكلام انتشر ان العربية خرجت بره السوق فعليا، لكن فجأة بدأت ميجان تظهر وتتواجد في النص الأخير من يناير.

إقرأ أيضا للكاتب إسلام حويلة :

هو السيارات مش سلعة أساسية يا مولانا؟ ده في الشارع اللي ورا

ايوة يعني حصل ايه يعني؟
زي ما بنقول "العين الحمرا" ظهرت من وكيل رينو ، تعليمات واضحة للموزعين بتسليم العربيات للحاجزين طالما توافرت ، وان أي حجب للعربيات وعدم تسليمها حيقابله قرارات عنيفة من جانب وكيل رينو .
صحيح احنا سمعنا الكلام ده كتير من الوكلاء وفي الآخر ده كلام في الهوا، والتربيطات بين بعض الوكلا والموزعين على سعر الاوفر بكام وانا نصيبي كام، لكن وكيل رينو بقاله اسبوعين مش وراه حاجة غير متابعة الموزعين وحركة تسليمات العربيات