الجيل الثامن من BMW الفئة الخامسة.. الأسطورة في مصر

الجيل الاول من BMW الفئة الخامسة ظهر للنور في 1972 وكان السبب في وقوف الشركة مرة تانية بعد ما كانت على وشك الافلاس والانهيار بعد وصاية "السوفييت" عليها بعد خسارة المانيا الحرب العالمية التانية.
تقدر تقول ان الفضل في بقاء اسم BMW يرجع لـ "هيربت كواندت" ولـ"الفئة الخامسة" ، الاول أنقذ الشركة من التلاشي وبيعها لشركة تانية، والفئة الخامسة سبب النجاح والارباح للشركة
الفئة الخامسة من BMW تقدر تقول عليها انها العربية "المثالية" ، وده تقريبا كان الكونسب اللي الشركة مشيت عليه من 1972 الى يومنا هذا.

يعني ايه "المثالية" دي اكسلانس؟   

 
سبق وكتبت عن الـX5 وقلت انها مع الفئة الخامسة بيمثلوا الـDNA لشركة BMW ، يعني لو انت عايز أداء رياضي بس ، شوف عربية تانية ، لو عايزها رفاهية بس ، شوف عربية تانية ، لوعايزها اعتمادية بس، شوف عربية تانية وهكذا، أما لوعايز عربية فيها كل حاجة بطريقة مثالية فمعندكش اختيار غير BMW الفئة الخامسة تحديدا.
المدهش في موضوع الفئة الخامسة، انك مش حتلاقي جيل "وقع" ، يعني حتلاقي في كل موديل شهير في جيل منه محققش النجاح المطلوب ، وده تشوفه من طرح جيل أجدد قبل المدة المتعارف عليها ، لكن الـ7 أجيال التاريخية من الفئة الخامسة ، كل جيل فيهم حقق اكتر من المطلوب.

الجيل التامن واللي حيتقدم في مصر رسميا الثلاثاء القادم ، زيه زي الأجيال السابقة ، لازم الشركة تضيف ليه حاجة تخليه "التوب" ، الجيل التامن في ديناميكية اكتر من أي وقت فات، متميز بثروة من الابتكارات الرقمية، ولأول مرة نسخة كهربائية بالكامل.
بالمناسبة ..لغاية مارس 2023 تم إنتاج أكثر من 10ملايين BMW الفئة الخامسة، وبيتم انتاجها في مصنع دينجولفينج، أكبر مصنع لشركة BMW في أوروبا.