صبر السيد هشام عزالعرب.. مصنع بروتون في مصر يشوف النور بعد سنين وسنين

في سنة 2016 وتحديدا في شهر مارس، بثت وكالة أنباء الشرق الأوسط –الوكالة الرسمية - تصريح على لسان السفير صلاح الوسيمي سفير مصر في ماليزيا آنذاك ، قال فيه ان شركة بروتون قررت إيفاد فريق ضخم إلى القاهرة الشهر المقبل لعقد لقاءات مع ممثلي الصناعات المغذية واستكمال البيانات والمعلومات اللازمة للانتهاء من وضع الخطوات التنفيذية الخاصة بمشروع عملاق لتصنيع سيارات الشركة في مصر على نطاق واسع يبدأ بنحو 100 ألف سيارة سنويا.

وبعد أكثر من 8 سنوات تقرر بروتون مع اصرار من المهندس هشام عز العرب على استكمال البداية، ويتم الاعلان النهاردة على تدشين مصنع عز العرب السويدى لانتاج سيارات بروتون، واللّي حيبدأ الانتاج الشهر الجاي بطاقة 40 ألف سيارة سنويا.

تقدر تقول ان تصنيع بروتون مختلف تماما عن أي مشروع تجميع حصل قبل كده في مصر، لأن المعطيات كلها بتقول ان مصنع بروتون في مصر حيكون قاعدة حقيقية للانتاج ، خاصة ان انتاج ماليزيا كله (هاند رايت) عكس أغلب دول العالم ليفت هاند(دريكسيون شمال).

كمان ، لمّا يكون رأس السلطة التنفيذية في ماليزيا حاضر لتدشين المصنع واعتزازه وطموحه انه يكون نافذة ماليزية لدول أفريقيا، ومعاه مجموعة وزراء ورئيس بروتون نفسها ،والكلام مش انه مجرد مصنع لشريك، لأ دول بيتكلموا عن المصنع بصيغة الملكية، بيتكلموا ان لبروتون مصنع.

المهندس هشام عزالعرب كانت كلماته مختلفة تماما عن كل مرة يلقى فيها خطاب، ممكن توصف طريقة حديثه، انه شخص ارتاح بعد صعوبات كتير في تحقيق هدفه ،حماسته في الكلمات، اصراره على تقديم منتج بجودة وأمان مع سعر منخفض مع مكون محلي بنسبة 48%.

ورغم ان مجموعة عزالعرب عندها فوق الـ10 علامات لكن بروتون حتكون في كفة وباقي العلامات في كفة.

طبعا لسة التسعير متمّش، لكن الكلام ان بروتون ساجا حتنزل بسعر أقل من 650 ألف جنيه ، وان جملة أرخص عربية في مصر حتكون المسيطرة أثناء التسعير.