دي مش لاندروفر.. دي علامة جديدة اسمها INEOS .. أيوة إنيوس وجرينادير كمان

علامة جديدة يمكن محدش سمع عنها قبل كده INEOS  "انيوس"، ودي تم الاعلان عنها رسميا في السعودية ووكيلها شركة الجميح.. قصة العربية دي غريبة ومدهشة في كل تفاصيلها .. اسمع يا سيدي

في مواطن انجليزي اسمه جيم راتكليف ، وده عقبال عندك عنده مجموعة شركات INEOS  اكبر شركة كيماويات في العالم ، يعني واحد من مجلس قيادة العالم، الراجل ده كان عاشق لـ"لاندروفر ديفيندر" وزي ما تقول ميقدرش يعيش من غيرها، ولما وقف انتاج ديفيندر ، راتكليف اتجنن وحسب كلامه ملقاش عربية تانية تسد الفجوة اللي سبتها ديفيندر ، وقالك انتوا مش عارفين انا مين؟

وزي فيلم العظماء السبعة كده، او شمس الزناتي، جمع فريق من الخبراء وقالهم عايز عربية احسن من دي (الديفيندر)

ايوة يا عمونا انت بتتكلم في عربية مش ازازة نفتالين بلي ، ماليش فيه، انا عايز عربية زيها.

 المهم الراجل كلّم حبابيه من مجلس قيادة العالم وعمل شوية اتفاقات مع BMW و Magnaو Boschو ZFو Carraro  وغيرهم عشان يزودوه بمكونات العربية.

 حلو طب عايزين مصنع، قالك موجود في لندن ، شوية بتوع حكومة ويلز قالولوا تعالى عندنا وخد امتيازات، طلع على ويلز ، ولسة بيقولوا يا هادي ، الجماعة بتوع مرسيدس كلموه : يا معلم راتكليف ،عندنا مصنع في فرنسا كنا بنعمل فيه عربيات سمارت وبطّلنا ، ومش حناخد منك كتير ، راح الراجل لامم حاجته وساب ويلز وطلع على فرنسا ، لدرجة ان حكومة ويلز بتطالبه بـ6 مليون استرليني دفعوها كدعم للمصنع ، طبعا اللّي يعرف ابويا يروح يقوله

وبعد 7 سنين تجارب فاشلة و تحسينات طلعوا أخيرا بعربية دفع رباعي، طب نسميها ايه؟ قالهم بصوا بقى في قهوة كنت بقعد عليها اسمها Grenadier (جرينادير)، فهو ده اسمها ،طبعا الخبراء بصوا لبعض وقاموا صقفوا وأشادوا باختيار الاسم الملهم لصناعة السيارات"تمّن"

وعليها ياسيدي بقى في علامة اسمها INEOS وعنده موديل اسمه Grenadier وصفها راتكليف  بانها انقى عربية دفع رباعي في العالم ولسة في السكة بيك اب وغالبا حيكون اسمها برضه Grenadier بيك اب.

بالمناسبة.. Grenadier قطعت 1.8 مليون كيلومتر اختبارات، واتصرف على القصة دي اكتر من 500 مليون استرليني.. والبيك اب سعرها المبدئي 66 الف استرليني ، اما Grenadier فمتوقع سعرها في السعودية يكون في حدود 350 الف ريال