اسلام حويلة يكتب : هيونداي ايونيك 5 وايونيك 6 ..الكهربا اشتغلت

في شهر رمضان لفت نظري بوست من هيونداي الشرق الاوسط وافريقيا عن ايونيك 5 او ايونيك 6 وفي نفس البوست شعار مجموعة غبور، سألت وعرفت ان العربيات بالفعل في خطة الشركة لكنها لسة قدامها وقت لتقديمها في مصر ، وتحديدا في يوليو.

ويبدو ان البوست كان لقياس مدى استعداد العملاء واهتمامهم بشرا عربيات كهرباء تكون من وكيل معروف وله تاريخ كبير ،وده ينقلنا لنقطتين مهمين بالنسبة لسوق الكهربا في مصر.

الأولى : هو ليه الإقبال متزايد على العربيات الكهربا عن طريق الاستيراد الشخصي؟

من وجهة نظري ،في تأخير وبطء من الوكلاء في تقديم العربيات الكهربا للسوق ، وده ساب فراغ عرف يستغله تجار "شاطرين" استوردوا وباعوا كتير خلال السنتين التلاتة اللي فاتوا، طبعا ساعدهم حوكمة الاستيراد التجاري، وسهولة الاستيراد الشخصي.

دايما لمّا الوكيل بينزل عربية ونفس العربية جاية من الخليج بتحصل مقارنة بينهم، السعر- التجهيزات ، وبناء عليه يقدر العميل يختار ، هل يتنازل عن الضمان والخدمة المعتمدة في مقابل فارق سعري ولا لأ؟

وهنا كانت المشكلة ، مفيش اصلا وكلاء قدّموا عربيات كهرباء عشان العميل يقدر يقارن ، وزي ما انت عارف فولكسفاجن id هي الأكثر مبيعا وانتشارا في مصر ، العميل حيقارنها بإيه؟

النقطة التانية المشكلات بتظهر بعد 3 سنين ع الأقل

كل العربيات الجديدة محتاجة ع الأقل 3 سنين عقبال ما تبدأ تحتاج صيانة وتظهر أعطال ، وبالتالي فكرة الخدمة والضمان لسة لم تختبر حتى الآن ووجهة نظرى مع نهاية 2024 او الربع الأول من 2025 ممكن نسمع بعض المشكلات سواء في عدم توافر قطع غيار ، او ظهور مشكلة ما اصلاحها حيكون مكلف سواء فلوس او وقت.

فولكسفاجن id4 بفئاتها تعتبر مستحوذة على تلتين مبيعات العربيات الكهرباء في مصر، ولما مجموعة غبور تنزل بالمنافس الرئيسي لـ"id4" اللي هيionic5 يبقى اختيار صائب خاصة انها تقريبا مفيش جايزة ما اخدتهاش سواء في الولايات المتحدة ،المانيا، انجلترا، او في اليابان.

بالمناسبة..ionic5 تم اطلاقها في فبراير 2021 وIonic6 في يوليو 2022 وionic حتبقى علامة فرعية من مجموعة هيونداي.. آخر حاجة ،تفاصيل ومواصفات العربيتين في الموضوعات المتعلقة