فاكر السوق السودا بتاعة الدولار.. حيبقى في زيها للعربيات المستوردة

السوق بيتنقل من المستورد لـ "المحلي" ، وكمان المحلي مش حيبقى زي الأول حتبقى المنافسة فيه عنيفة جدا والجودة حتكون الأساس، لأن السعر حيبقى مقارب.

أوعى تفتكر ان في تحديث بيقعد شهر ونص ولسة مكمل، انت مش شايف بيحصل ايه في السوق، دي مشكلتك انت، وده الفرق بين شركات عندها رؤية وشركات "بتقاوح"، زي فكرة واحد قاعد على فيسبوك ويقولك الأسعار حتنزل، لا هو حيتشري ولا هو عايز حد يشتري.

لمّا يتفق توجه شركات السيارات الكبيرة الى التجميع المحلي، يبقى ده مش توارد خواطر، ده سباق نحو البقاء والاستمرار.

أغلب الظن ان الاستيراد حيبقى بالقطّارة، منطقة حرة، ولبعض الشركات مقابل التصدير، وده مش لشهرين تلاتة، على الأقل سنتين تلاتة.. يفتح شوية، يحدّث شوية، فوضى الاستيراد الموجودة حاليا حتنتهي بنهاية السنة.

الأسعار تطلع، توّلع، مش حتفرق خالص، الجزائر قافلة الاستيراد من 2017 وكمان التجميع المحلي ورتبوا البيت وبدؤوا في 2023 في اقامة مصانع.. والمسألة عدّت والجزائر بخير.

تعالى نشوف الوضع عندنا :

كل الشركات الكبيرة في السوق فاهمة ده كويسة، مجموعة غبور عملت مصنع ثالث عشان يجّمع موديلات جديدة ،وكمان في تحديثات للموديلات القديمة، والمنصور للسيارات في سباق مع الزمن لانتاج MG5 وموديل تاني، ده غير موديلات شيفروليه الجديدة مع جنرال موتورز مصر.

ناتكو وكيل اكسيد، حتقدم موديلين تجميع محلي في سبتمبر، ودي السابقة الاولى ان شركة تبدأ بتجميع محلي بدون ما الموديلات المستوردة تنزل السوق.

نيسان مصرعندها صنى وسنترا وعندهم كمان موديل جديد ح يتم تجميعه لأول مرة، ده غير جلوبال اوتو والقصراوي وتويوتا وعز السويدي وغيرهم

الناس دي مش بتلعب وبترمي فلوسها، الناس دي بتستثمر وعارفة بتعمل ايه كويس.

العربيات المستوردة حتبقى من النوادر، حتبقى عاملة زي السوق السودا بتاعة الدولار في 2023، سيبك من شوية المعارض اللّي سيادتك شايفها وشايف قدّامها "رصة" عربيات.. قبل نهاية السنة مش حتلاقي لا العربيات ولا المعارض نفسها.. إلا القديم منها بس.

بالمناسبة.. بوجاتي أعلنت عن موديل جديد باسم "توربيون" بقوة 1800 حصان وسرعة تتعدى الـ400 كيلومتر في الساعة، والانتاج 250 سيارة بس، والسعر حيبدأ من 3.8 مليون يورو وبداية التسليم في 2026.. قلت اقولكم لو حد حابب يحجز😎