اسلام حويلة يكتب : يا بنى آدم دي BMW ..عايز ايه بعد كده؟!

قليلين أوي اللي بتتاح ليهم فرصة القيادة على حلبات سباق الفورمولا 1 ، وقليلين برضه اللي بتتاح ليهم تجربة موديلات الـM Power من BMW.

شركة جلوبال أوتو وكيل BMW و Mini في مصر قررت تعمل ده ، ووجهت الدعوة لمجموعة من الصحفيين المتخصصين في السيارات عشان يجربوا موديلات BMW باقة M الرياضية في ميونخ، وبالفعل جربنا العربيات لمدة يومين كاملين ، قيادة لمسافات طويلة على طرق مفتوحة السرعات ، يعني عندك لغاية سرعة 250 كيلومتر، مع "طرق" متعارف عليها دوليا تقدر من خلالها تختبر العربية على مختلف الظروف والمنحنيات ، عشان تكون تجربة حقيقية وبجد، مع تطبيق الالتزام الحرفي بكل قواعد المرور.

طبعا في عربيات في رأيي وصفها يكون بكلمة واحدة، يعني لما حد يسألك مثلا عن رايك الـX2 يكون ردك BMW عايز ايه بعد كده؟!

لغاية هنا والأمور طبيعية ، لكن في اليوم الثالث توجهنا الى حلبة سالزبورج في النمسا عشان نختبر قيادة الـM4 على الحلبة، ودي كانت من أمتع الأوقات، تجربة مثيرة  انك أصلا تنزل تراك فورمولا1 وتسوق، الممتع أكتر انك راكب BMW M4، طبعا في فريق متخصص من فرع M الرياضي في الشركة ادانا كل التعليمات والتحذيرات وشرح بالتفصيل كيفية اجتياز "لفة" بتكنيك سباقات الفورمولا، نظريا ولما نزلنا التراك وقف عند كل نقطة وشرحها عمليا.

نيجي للمتعة والاثارة، الـM4، فكرة انك متخافش دي في منتهى الصعوبة ، ممكن في اللفة الرابعة أو الخامسة قلبك" يجمد"، اصل بدايتها "تخض" سرعة الانطلاق والوصول لـ100 كيلومتر في 3.9 ثانية وانت مكمل التسارع حتخطفك، دخولك على منحنيات U بسرعة 70 مش سهلة، صحيح ممكن توصل السرعة لـ100 كيلومتر ، بس دي محتاجة فيرستابن او لوكلير يعملها، انك تكون في كامل تركيزك عدد كبير من اللفات دي صعبة جدا، اصلك لازم تبقى حافظ كويس امتى تلف وامتى تيجي يمين أو شمال، ازاي متضعيش وقت باستخدام الفرامل، وغيره كتير جدا.. بس للأسف الكتابة مينفعش تطول عن كده..