تسلا : من النهاردة مفيش جناح.. عربياتي هي الجناح

كل شركات العربيات المشاركة في معرض باريس واخدة مساحات كبيرة وعاملين ديكورات أنيقة، كل شركة وحسب الـCi بتاعها ، وفي ابهار في بعض الأجنحة ، وكمان حتلاقي في ديكور خاص بعرض العربية السوبر اوالجديدة كليا واللي الشركة مشتركة مخصوص في المعرض عشان تطلقها عالميا ، لكن في جناح شركة تسلا الوضع مختلف.

جناح شركة تسلا بدون أي ديكورات أو تصميمات نهائيا ،حتى الأرضية ،الأخ ايلون موسك قالك وانا اصرف واعمل عشان بعد ده كله تطلع شركة عاملةتصميم احسن منى.. وعلى إيه

نحن تسلا "بصوت المعلم حلاوة العنتبلي" يعني الناس هي اللي تجيلنا وتقف طوابير كمان ، وفعلا صدّر سايبرتراك في ناحية وبقاية الموديلات متوزعة وفي النص جاب روبوت تسلا الشهير في غلاف زجاجي وكان الله بالسر عليم.

وكل ساعة افتح سايبرتراك شنطة وابواب وزجاج، والناس في زحام عشان التصوير، ولا مؤتمر ولا وجع قلب.. المؤتمرات دي للشركات التوتو .. نحن تسلا ..عربياتنا لوحدها كفاية.