اسلام حويلة يكتب : هي وصلت لطيّارة كهربا؟! دي فيها يا جنّة يا نار

لفت نظري في معرض باريس للسيارات طيارة اكسبنج الشهيرة، كانت معلقة في جناح الشركة ، ودي مش جديدة لكنها تعتبر ثورة جديدة في التكنولوجيا ، لكن اللي لفت انتباهي اكتر من طيارة اكسبنج اللي أشبه بالدرون ، طيارة تانية كانت معروضة لشركة مش فاكر اسمها ، طيارة كهربائية بالكامل، طيارة حقيقية مش نموذج أو مجرد شو.. وكان فكرة العرض ان الكهرباء متاحة من الدراجة النارية مرورا بالجيت سكي بالسيارة وانتهاء بالطيارة.

أول ما شفتها جه على بالي تعليق السيد محمد (شادي) ريان رئيس مجلس ادارة شركة المصرية للسيارات على اليخت الكهربائي بالكامل اكس شور، وانه لو حدث والبطارية خلصت في عرض البحر..

ايه العمل؟!

في النهاية ممكن تبلغ الانقاذ او خفر السواحل بمشكلتك ويتم المساعدة سريعا، ولو دخلت الكهربا في اليخوت مش بعيد تلاقي محطات شحن مائية سواء داخل المياه الاقليمية للدول او حتى في المياه الدولية، الناس دي تقدرتعمل ده حتى لو تكلفتها عالية جدا .. لكن في حالة الطيارة لو لأي سبب ما خلصت البطارية..

ايه النتيجة؟

وانت سايق العربية الكهرباء دايما عينك على البطارية وفيها شحن اد ايه؟ ويمشيك كام كيلومتر ، وبتفضل طول الوقت قلقان لو على سفر ، وتخيل لو دخلت على محطة شحن حسب التطبيق ما اشار عليك ، وفوجئت ان المحطة خارج الخدمة لأي سبب ما؟

طب لو انت بالليل او الفجر حتبقى في قلق كبير جدا ، رغم ان المسألة شوية وقت بس.

ولو انت في البحر باليخت الكهربائي ونفس الموقف حصلك (البطارية فضيت) حيبقى القلق أكبر بمراحل، لكن هل ممكن تجازف بحياتك وتطير بطيّارة كهرباء؟

أصل دي مفيهاش قلق، دي فيها يا جنّة يا نار.