أيوة مصر .. تطوير برمجيات 60% من انتاج شركة Valeo بأيدي مصرية

في معرض باريس للسيارات تم توجيه الدعوة لي لحضور جولة تعريفية لمنتجات شركة Valeo اللي بتقدمها لشركات السيارات العالمية ، وشركة Valeo هي واحدة من أكبر شركات التكنولوجيا في صناعة التنقل ، وهي شركة فرنسية،تقدر تقول انها الرائدة في مجالات السيارات الكهربائية وأنظمة مساعدة القيادة وأنظمة الإضاءة وابتكار التجربة الداخلية.

وبالفعل صحبتنا السيدة مريم القاضي مدير العلاقات العامة والحكومية في مصر في الجولة وكان معنا العزيز حسن صالح من عالم السيارات

بصراحة تجربة ومشاهدة التكنولوجيا الأحدث واللّي سيتم الاعلان عنها تباعا هي تجربة غير عادية، فيها ابهار حقيقي للتكنولوجيا اللي وصل ليها العالم ، طبعا كان التصوير غير مسموح به اطلاقا ، لكن الأهم من انبهاري بالتجربة كان انبهاري بالمستوى اللي وصلنا ليه في مصر.

فرع Valeo في مصر هو أكبر فرع للشركة عالميا، هو مركز بحث وتطوير البرمجيات (سوفت وير) اتأسس سنة 2005 بـ25 مهندس بس، والنهاردة الفرع بيضم أكتر من 3000 مهندس برمجيات مسؤولين عن تطوير حوالي 60% من انتاج البرمجيات في Valeo.

ورغم ان الهند تعتبر بلد (السوفت وير) لكن يبدو اننا بنقلّل من نفسنا كتير، اختيار مصر والعدد الضخم ده وانتاج حوالي 4 مليون ساعة عمل سنويا، يقولك ان البلد دي فيها من الكفاءات والعلم الكتير جدا، ولمّأ سألت عن ميزة مصر عن الهند مثلا كانت الإجابة مستوى التعليم وإجادة اللغات الأجنبية، رغم ان الهند أقل منّا في الأجور .

أيوة مستغربش ، انا مش بقول كلام من دماغي ، انا بقولك على شركة أجنبية بتوظف اكثر من 3000 مهندس مصري مسؤولين عن تطوير 60% من انتاج اكبر شركة برمجيات في العالم في قطاع السيارات.

طب فرع مصر بيشتغلوا على ايه بالظبط؟

تطوير أنظمة القيادة الذاتية والمقصورة الرقمية والركن الآلي والدفع الكهربائي والإضاءة الذكية ، وكمان فرع الشركة في مصر عامل اتفاقية مع 20 جامعة حكومية وخاصة لتدريب الطلبة وتزويدهم بمناهج دراسية وكمان توظيف الأكثر تفوقا منهم.