اسلام حويلة يكتب : التحدي الأصعب .. ناتكو وExeed وتركيبة السوق المصري

علامة Exeed بتواجه تحدي كبير جدا في تركيبة السوق المصري ، لأن العربية غالية جدا ، ومش كهربا زي اكسبنج مثلا ، دي أغلى منها، وكمان تجميع محلي، لكن الخامات المستخدمة عالية أوي ، التكنولوجيا متقدمة جدا ، فيها Full ADAS يعني أمان كامل، وهي زي ما قلت جاية تنافس بشكل مباشر العلامات الاوروبية الفاخرة زي مرسيدس وBMW.

ناتكو عشان تاريخها كله بتتعامل مع عملاء مرسيدس ، فلمّا شافوا العربيات قدروا بسهولة يكتشفوا أد ايه العربيات دي مختلفة ، وتقريبا دخلوا التحدي ده واستثمروا في التجميع لأن محركات العربيات أعلى من 1.6 لتر ، وبالتالي لو دخلت مستوردة فأقل عربية حتعدي الـ6 مليون جنيه بسبب الجمارك والضرائب.

انا شخصيا مذاكر عربيات Exeed كويس وفي كذا اجتماع اون لاين مع الشركة في الصين سمعت وشفت أد ايه همّا مهتمين بتفاصيل متهمش إلا الفئة دي من الشركات

السيد يحيى عبدالقدوس مدير عام العلامة ،حكى في لقاء أمس انه لمّا بدؤوا تجميع سيارات مرسيدس في مصر قعدوا سنة ونص يقنعوا العملاء ان مفيش فرق بينها وبين العربية المستوردة من ألمانيا، المهندسين ألمان ، وادارة الجودة ألمان ، وإدارة المصنع والعمليات في مصر ألمان ، ورغم كده قعدوا مدة عشان العميل يتقبل العربية رغم فارق السعر بين المحلي والمستورد., وقد كان.

علامة Exeed نازلة بموديل RX بـ5 مقاعد وموديل VX بـ7 مقاعد ، والأهم ان الموديلين حديثين وبيتم تجميعهم ، موديل RX تم الكشف عنه في 2023 ، وده برضه بينقل مستوى الصناعة المحلية في حتة أفضل بكتير.

توقعاتكم للسعر ايه؟

بالمناسبة.. تقرير تراخيص المرور لشهر أكتوبر : الأول شيري 1701 وحدة والثاني هيونداي بـ1407 والثالث MG بعدد 1097 وحدة أما الرابع نيسان بـ923 وحدة والخامس مرسيدس بـ897 وحدة.