افتتاح مصنع عزالعرب-السويدي لتجميع سيارات بروتون في مصر.. لكن ايه بقى ‼

يوم الثلاثاء الجاي حيتم افتتاح مصنع عزالعرب-السويدي لسيارات بروتون في حضور السيد أنور إبراهيم رئيس وزراء ماليزيا، وبالمناسبة دي تعالوا نتكلم شوية عن التجميع المحلي في مصر من واقع أرقام التراخيص في 2024.

👈عندنا 7 علامات بتجمع موديلات وهم نيسان وشيري وهيونداي وBYD وتويوتا وBMW ومرسيدس ، بمجموع 17 موديل ، واستبعدت جراند شيروكي لأنها بدأت نهاية سبتمبر وأرقامها لسة مش متاحة.

👈مجموع تراخيص الموديلات لنهاية سبتمبر 2024 تقريبا 23 ألف وحدة سواء CKD أو SKD.

👈عندنا 4 علامات بـ8 موديلات أسعارهم بتبدأ من 620 ألف جنيه (BYD F3) ولغاية مليون و75 ألف جنيه (تيجو7).

👈موديل واحد (تيجو8) من مليون و100 لغاية مليون 280 ألف جنيه.

👈8 موديلات في شريحة سعرية أعلى بكتير بتبدأ من 3 مليون و400 ألف جنيه (فورتشنر)

انت عايز تقول ايه🤔

♨احنا منتظرين تجميع 7 موديلات جديدة من 6 علامات مختلفة ، منهم 5 موديلات أسعارهم تقريبا في نفس الشريحة السعرية الأولى من 600 ألف الى مليون و100 ألف جنيه.

😎طب الشريحة دي باعت في 2024 حوالي 19625 وحدة، برضه لغاية شهر سبتمبر، بمتوسط 2180 عربية في الشهر ، يعني متوقع يقفلوا السنة بـ26165 وحدة.

احنا في انتظار جيلي امجراند وبروتون ساجا وMG5 وشيفروليه اوبترا سواء نهاية السنة دي او السنة الجاية ، لأنهم في الغالب في نفس الشريحة السعرية🧐🧐

موديلين اكسيد في الشريحة الأعلى لأنه متوقع الأسعار تبدأ من 3 مليون جنيه، ولسة مش عارفين شانجان CS55 Plus حتبقى بكام وان كان توقعي انها برضه في الشريحة الأولى وح تنافس تيجو7.

مثلا MG5 حتاخد عملاءها ، طب اوبترا وامجراند وساجا.. حياخدوا عملاء منين؟

فالسؤال هنا .. هل العربيات الجديدة دي حتجذب شريحة جديدة من العملاء ولّا حياخدوا من بعض؟

مش عايز رؤيتي تكون سلبية للسوق وللتجميع المحلي ، لكن لو شفنا ارقام اكثر 4 سيارات مستوردة ترخيصا وهم سبورتاج وكورولا وتوسان وZS حنلاقي ان مبيعاتهم 17406 وحدة ، ومفيش عربية تجميع محلي نازلة تاخد منهم في الشريحة دي.