من يناير..3 جبهات مفتوحة ضد "بابا الشغلانة" والحسم عند الموزعين

بدل ما انت قاعد تتفرج على صور احتفالات أعياد الميلاد وتقول "يا ريتني كنت معاهم" تعالى نحاول نفهم السوق الفترة الجاية وتحديدا في الربع الأول حيبقى عامل ازاي❓

احنا متفقين ان المنافسة حتكون عنيفة جدا في 2025، ويمكن اكتر شركة عليها العين هي لو جاز التعبير "بابا المجال في الـ CKD" مجموعة جي بي اوتو.

👈جي بي اوتو عندها شيري اريزو 5 ودي نازل لها بروتون ساجا، وعندها هيونداي اكسنت ونازل لها شيفروليه أوبترا،وهيونداي النترا AD ونازل لها جيلي امجراند،وكلهم نازلين في يناير، يعني منافسة من كل جهة.. ده لسة الربع التاني في كلام تاني.

☢️الأرقام بتقول ايه "التراخيص طبعا".. ان مجموع موديلات جي بي اوتو الثلاثة حوالي 9000 وحدة لغاية نوفمبر ، أهمهم النترا AD مكملتش نص سنة يعني الطبيعي الرقم يبقى 11 ألف وحدة في السنة الكاملة، هل حتحافظ جي بي اوتو على الأداء نفسه في ظل وجود منافسين جدد؟

قبل الإجابة محتاجين نعرف هل حجم السوق حيزيد وبنسبة كام؟

📢توقعاتي انه حيزيد بنسبة 10% بس، يا دوب يوصل170 ألف عربية، بس الزيادة دي متستوعبش كل التجميع المحلي الجديد.

نيجي للي بعده والأهم

⚡كل اللي جمّع عارف ومتأكد ان الاستيراد في 2025 في أفضل الأحوال حيزيد عن 2024 حاجة بسيطة جدا مع وقف الاستيراد الشخصي تقريبا، وان كل الاستثمارات دي لازم لها حماية نوعا ما والمتمثلة في الـ Acid Number، وده حيحقق المطلوب ان التجميع المحلي ياخد "مجراه".

📌نوضّح أكتر ، السوق مش حيزيد الزيادة المطلوبة، لكن مع "قفل الحنفية" مفيش قدّام الزبون والمتوفر واللي سعره في المتناول غير التجميع المحلي، فده ممكن يخلي الـ CKD يعرف يبيع الحد الادنى اللازم🆒

🤔اللي هو كام يعني؟

الطبيعي ان موديل جديد باستثمارات يبيع 5000 وحدة، لكن مع ظروف السوق بتاعنا لو باع 2500 عربية في أول سنة يبقى 💯💯

👈بس برضه ده رقم لا هو صعب ولا هو سهل؟

نيجي للعنصر الأهم في المسألة ..الموزعين أيوة دول حيحسموا المسألة سنة 2025 بس خلينا نكمّل بكرة واسيبك تكمّل فرجة ع صور الكريسماس🎄