امتى نقول على علامة إنها ناجحة ..طب لو فيها تجميع محلي؟

عقود الشركات الأم مع وكلاءها بتنص على "تارجت" 🎯مبيعات سنوي ، لو علامة جديدة التارجت بيبقى ضعيف جدا في أول سنة (50 عربية) ويبدأ يزيد تدريجيا مع السنين، ولو علامة معروفة وتقيلة فحسب طموحها، طموح الشركة الأم وطموح الوكيل.

بس بعيدا عن "التارجت" لو حبينا نوصف شركة انها ناجحة أو لأ ، ممكن رقم مبيعات كام يكون الرقم الحاسم في المسألة خصوصا بعد أول سنة أو السنة التانية.

طبعا تاريخ العلامة في مصر بيفرق ، يعني لو اتكلمنا على العلامات الصينية فجيلي أو جيتور أو حتى بايك مش زي GAC وطبعا مش زي اكسبنج ، لأن العلامات المذكورة اولا تعاقب عليها وكلاء في مصر، يعني علامة بقالها سنين، غير GAC اللي أول مرة تنزل مصر أو اكسبنج اللي اول مرة تنزل وكمان كهربا.

⚡طب هل لو علامة عدد مبيعاتها (عدّى) الـ3000 عربية كتراخيص، انا بتكلم عن علامة، يعني وارد جدا تلاقي عربيات استيراد ومبادرة في الحسبة ، تبقى ناجحة؟

♨يعني هل بعد رقم 3000 وحدة في السنة نقدر نقول على العلامة انها ناجحة؟

رأيي في حالة ان العلامة لو كل موديلاتها استيراد ،نقدر نقول انها ناجحة، ، صعوبات كبيرة قابلت كل المستورد سواء في الاعتمادات او الـ Acid Number، ورغم كده انك تعدي الرقم ده يعتبر نجاح

بس لو علامة عندها خطط تجميع محلي.. هل نفس الرقم كاف؟

لا يا حلو ، هنا محتاج 2000 عربية زيادة في أول سنة مع كل موديل يتجمّع، (طبعا انا بتكلم على عربيات في المتناول اسعارها حتى 1.3 مليون جنيه مثلا).

على كده أغلب العلامات في مصر مش ناجحة؟

هي نسبة وتناسب، في علامات معدية الـ5000 وحدة في السنة، بس رأيي انهم مش ناجحين، لان تاريخهم ووضعهم واسعارهم يقول انهم المفروض يبيعوا اكتر من كده.

وفي علامة لو عدّت الـ1000 وحدة تقول عليها "بطل" زي "هوندا" مثلا، صحيح أغلبها استيراد بس علامة جامدة كده في نفسها..ده موديل أكورد الجاحد رخّص 250 عربية في 2024