إكسيد RX مفيهاش هزار خالص ..حقّها ولا مش حقّها؟

الثلاثاء الماضي كان عندي اجتماع اون لاين مع شركة إكسيد الصينية، وفي الاجتماع تم شرح مفصّل لموديل Exeed RX وحضره من جانب الشركة مدير الشركة الاقليمي ومدير التطوير ومدير العلامة في مصر وكنت أنا الطرف الثاني في الاجتماع.
لا يا جماعة، الشركة دي مش بتهزر خالص، عاملين عربية مفيهاش غلطة ، عاملين حساب أدق التفاصيل ، كل حاجة تتخيلها موجودة في العربية ، أصلا التصميم مبهر ، وزي ما قلت قبل كده ، همّا حاطين نفسهم في مصاف الشركات الفاخرة زي لكزس وأودي وBMW ، حتى في دراسات السوق والبحوث التسويقية كل المقارنات بالشركات الفاخرة دي ، لو قارنتهم بشركة صيني تبقى "بتشتمهم" حرفيا.

ولمّا سالتهم ازاي حتنافسوا العلامات "الكبّارة" دي اللي بقالهم عشرات السنين في السوق، وايه هي الميزة اللي حتقدموها، كانت الإجابة انهم قدروا في وقت قصير في اثبات تواجدهم في العديد من الاسواق، والمبيعات بتنمو سنة ورا سنة، وان الجودة اللي بيقدموها والتكنولوجيا الفريدة غير المتواجدة في العلامات الفاخرة الأخرى حيلمسها أي عميل بمجرد رؤيته للعربية والجلوس فيها وقيادتها.

طبعا عرضوا خططهم المستقبلية والموديلات القادمة سواء الوقود العادي "ICE" او الكهربائية ، كمان ازاي بيتم ربط العلامة بمستوى معين او بفئة معينة، وان بيهتموا برعاية أحداث خاصة جدا، كمان الـCI بتاع معارضهم تحس انه فندق 7 نجوم.
طبعا الفيديوهات والصور اللي تم عرضها في الاجتماع خلتني اسرح في فكرة همّا حيصنعوا ازاي في مصر وح يبيعوا بكام؟ والاهم فكرة اللي بيقول دي عربية "صيني"😉
معتقدش ان الـCKD حيبقى مطروح ، لازم حيشتغلوا SKD والمشكلة اللي حتواجههم ح تبقى المكونات المحلية وجودتها، كمان في ظل سعر الدولار والـ67% جمارك ورسوم ..العربية حتبقى بكام؟
بالمناسبة.. أكسيد عندها 4 موديلات 2 منهم بمحرك أعلى من1.6 لتر، اعتقد دول بره حسبة الاستيراد ع الأقل ، واثنين بمحرك 1.5 لتر منهم الـRX.. ودي اللي الوكيل المصري شركة ناتكو للسيارات حتطرحها في السوق ، بس مش قبل يونيو الجاي..