شيري تيجو 4 برو.. ازاي تهتم بالتفاصيل عشان تنجح

اهتمام الشركات الصينية بالأسواق الخارجية شيء مثير للاعجاب، السوق الصيني لوحده بيستوعب تلت انتاج العالم من العربيات ، ومثلا شركة زي BYD هي الاكبر في مبيعات العربيات الكهرباء بمختلف انواعها عالميا، لكن تلاقي ان السوق الصيني لوحده بيبيع اكتر من 90 % من انتاج BYD، لكن همّا عارفين كويس انها مسألة وقت وحيحصل نوع من الهدوء في المبيعات في السوق الصيني وساعتها مفيش غير الاسواق الخارجية.

شركة شيري مهتمة جدا بالموضوع ده ، والسوق المصري بالنسبة لهم مهم جدا، كونهم رقم 1 في المبيعات بيديهم دافع انهم يحافظوا على مركزهم ، وبالتالي عندهم خطط مستقبلية طويلة المدى خاصة بطرح الموديلات ، مستوردةوتجميع محلي، مهتمين يعرفوا كل تفصيلة في السوق المصري، بيجمعوا بيانات ومعلومات السوق ويحللوها ويحطوا سيناريوهات التعامل مع كل وضع.
طبعا مع وكيل تقيل زي "جي بي اوتو" المسألة بتفرق كتير جدا، خطوط انتاج لاكثر من موديل ، استيراد مجموعة من الموديلات ، تجهيز لطرح عربيات هايبريد وكهرباء، انتشار في كل حتة في مصر ، قطع غيار متوفرة، اعادة بيع محترمة وغيره.

تقدر تقول ان شيري الصينية كل منتجاتها بتخرج تحت سلالتين ، الأولى السيدان تحت اسم أريزو ، والتانية SUV تحت اسم تيجو ، وفي سلسلة بس لسة طازة اسمها سلسلة eQ المفترض انها لعربيات الطاقة النظيفة وكده، بس مفيش حاجة عندهم مضمونة، ممكن في اي لحظة تبقى علامة منفصلة .. زي اكسيد واومودا وكايي وغيرها.

شيري متاخرة جدا في الكهرباء مقارنة بباقي الشركات الصينية الكبيرة، بس تحس انهم مش قلقانين من الموضوع ده.
شيري باعت حوالي 1.88 مليون وحدة في سنة 2023 بنمو 47.8%، وحافظت للعام الـ21 على التوالي كأفضل شركة صينية لصادرات عربيات الركوب.

بالمناسبة .. تيجو 4 برو كان مفترض تتقدم من فترة بس ظروف الاقتصاد والسوق والحركات أجلّت التقديم ، وتقديمها برضه المفترض يكون نهاية أبريل الجاي.