اسلام حويلة يكتب : سعر موديلات سوبارو.. حد ليه شوق في حاجة

مجموعة ابوغالي اعلنت عن عربيتين جداد في السوق المصري، كروستريك و فورستر وقدمتهم في حفل أنيق يوم الاثنين الماضي ،وطبعا سوبارو يابانية، وشركة تويوتا ليها 20% في شركة سوبارو يعني حصة محترمة وكمان بيتم انتاج عربيات على منصة مشتركة.

كروستريك وفورستر نازلين بمحركات 2 لتر، سوبارو خلاص بطّلت محركات أقل من كده ، وده معناه اجمالي جمارك وضريبة ورسوم 221%، وده رقم لو تعلمون عظيم، يعني لو عربية بـ20 الف دولار يبقى رسومها مليون و372 الف جنيه.

طيب ازاي مجموعة أبوغالي أعلنت ان سعر "كروستريك" 2.495.000 وان سعر "فورستر" 2.695.000  جنيه؟

يعني تقريبا بسعر عربية كوري جاية من اوروبا بزيرو جمارك

سوبارو اليابانية بتنفذ خطة التحول الكامل للكهرباء، وان بعد كام سنة مفيش عربيات ice تاني ، والبداية كانت بوقف تزويد عربياتهم بمحركات 1.6 لتر، وده معناه بالنسبة لمصر انتهاء سوبارو فعليا في السوق، وعشان يبدأ تقديم عربيات هايبريد او كهرباء آخر سنة 2025 او بداية 2026، تكون علامة سوبارو في طي النسيان.

إقرأ أيضا للكاتب اسلام حويلة : دولارات رأس الحكمة وأسعار السيارات.. “اللّي اتلسع من الشوربة”

وبحسب تصريحات المهندس تامر قطب رئيس العمليات في مجموعة ابوغالي موتورز، إن المشاورات والمفاوضات بقالها فترة طويلة في السكة دي، وان الشركة اليابانية تفهمت تماما الوضع خاصة وان السوق المصري مهم لسوبارو، فتم تقديم دعم كبير للوكيل المصري.

مش بس كده، حالة الين الياباني متدهورة بشكل كبير جدا من نهاية 2022 امام الدولار واليورو وبقية العملات - لأ الجنيه المصري مش في الحسبة- والتقارير الاقتصادية بتؤكد ان قيمته الحقيقية بتقل 35% عن الواقع اليومين دول.

يعني مع الدعم اللي قدمته سوبارو وظروف الين الياباني قدرت المجموعة تقدم العربيات بالسعر ده.

بالمناسبة..سوبارو XV محققة مبيعات كويسة جدا في 2023 قياسا الى وضع السوق، وال “كروستريك” هي هي الـXV بس بمحرك بوكستر 2 لتر وشوية تحسينات