كيا سيراتو وريو دول تشوفهم مستعمل .. حاليا K3 وK5 وK9 وكده

نشرنا خبر في "مارشدير" عن استيراد تاجر سيارات لدفعة من كيا K3 موديل 2024 ، وطبعا اغلب الناس قالت دي سيراتو الجديدة وفي القليل اللي قال انها ريو الجديدة ،منعا لللغط في اسماء الموديلات والتغييرات اللي فيها، قلت اتكلم شوية عن موديلات كيا الجديدة..
موديل سيراتو اللي كلنا عارفينه، بينزل السوق الامريكي باسم فورتي، وفي الصين باسم شوما ، وفي كوريا سيراتو K3 ، وبعض الاسواق كان بينزل باسم K3 بس من غير حاجة.
كيا عملت شوية تغييرات في احجام واشكال الموديلات ، يعني K3 اللي هي كانت سيراتو بقت موديل تاني، اقرب للريو ، وسيراتو بقى فيه موديل اقرب ليه نوعا ما اسمه K5 ، واصلا K5 ده كان اسم كيا اوبتيما، اللي غالبا بقى فيه موديل اشبه ليه بس نازل تحت اسم K9.
طبعا محدش فاهم حاجة ؟ ان كنت انا نفسي شاكك ان كنت فاهم ولا لأ؟
المهم موديل K3 ده موديل قائم بذاته لا هو ريو ولا هو سيراتو ، وموديل K5 برضه موديل قائم بذاته لا هو سيراتو ولا اوبتيما ، ونفس الكلام لموديل K9.
وطبعا موديل K4 اللي تم الاعلان عنه تشويقيا اليوم ،ده موديل رابع ملوش علاقة بالباقي ، وعشان تفهم اكتر ، اتعود انه خلاص  لا في سيراتو ولا ريو .. مش حتشوفهم تاني قريب ولا حتسمع عنهم غير في اعلانات المستعمل بس ، حاليا موديلات كيا الجديدة نازلة بحروف وأرقام .. K5، K4 ، K3،و K9 ، طبعا ده غير الكهربا اللي نازلة بحروفEV وبعدين رقم من الارقام.
احنا في مصر في الغالب ماشيين ورا تسمية المصنع او بلد المصنع ، بس المرة دي K3 بتصنع في دولة المكسيك، فغالبا العربية حتنزل بنفس الاسم ، وغالبا برضه بنفس المحرك 1.6 لتر.

بالمناسبة .. مش معنى ان الأسماء اتغيرت عالميا  ان الاسماء القديمة انتهت، عادي جدا العربية تنزل الولايات المتحدة باسم فورتي ، وممكن تلاقيها باسم جديد تماما في سوق تاني