سوق السيارات والعميل .. انك لـ"ميت" وانهم لـ"ميتون"

سوق السيارات حاله يصعب ع الكافر ، لا بيع ولا شرا ، تخفيضات اسعار مستمرة على أمل السوق يتحرك، بس غير ان شهر رمضان الحال بيهدى فيه ، لكن توالى اخبار تدفقات النقد الأجنبي في وسائل الاعلام خلق حالة عند الزبون ان الدولار في النازل وده معناه ان الاسعار حتبقى في النازل أكتر وأكتر .. مبيعات شهر فبراير اللي أغلبها استيراد شخصي ومبادرة المصريين في الخارج كانت قليلة جدا مقارنة بباقي الشهور ، بس بالمقارنة مع مبيعات مارس اللي احنا فيه حتبقى قياسية ، وده كله بسبب زيادات الاسعار الرهيبة اللي حصلت خلال السنة اللي فاتت.. يعني مارس داخل دخلة انك لميت وانهم لميتون

الوضع ده اكيد سيء جدا .. لكن الأسوء ان محدش لسه عنده رؤية واضحة ايه اللي ممكن يحصل لسعر الصرف خلال الفترة القادمة.

يعني لو حتى جنّبنا استيراد السيارات من الخارج، واتكلمنا عن استيراد مكونات انتاج فهل المسألة واضحة عشان الشركات تبدأ في اعادة خطط التجميع مرة تانية؟

عندنا خطوط تجميع مؤجلة عند شركات كتير بسبب سعر الدولار وعدم توفره خلال الفترة السابقة،عندنا على سبيل الحصر شركة جي بي اوتو عندها خطط تجميع لموديلات من شانجان وهافال وشيري، عندنا جنرال موتورز وتجميع لسيارة شيفروليه سيدان،وعندنا المنصور وتجميع موديل MG، نيسان جاهزين بخطة لاضافة موديل تالت بجانب صنى وسينترا ، القصراوي عنده عربية جيتور محلية ، سوزوكي عندهم سيدان ، ناتكو عندهم اكسيد ، بروتون عندهم ساجا.. اوتوموبيلت عنده موديل جيلي.. ده غير خطوط الانتاج القائمة بالفعل واللي شغّالة بكميات قليلة بحسب القدرة على استيراد المكون.

الخلاصة ان سوق السيارت او بمعنى أدق صناعة السيارات في انتظار رؤية واضحة من المسؤولين في الحكومة عشان ينطلقوا ، ومع الاستراتيجة الموضوعة ، سوق السيارات في مصر حيروح حتة تانية.

بالمناسبة .. حنشوف بعد العيد مجموعة حلوة من العربيات الجديدة او المحدّثة زي اوبل كورسا فيس ليفت