سامي مغاوري : عملها الاستاذ ماجد وجاب KGM توريس

عجبني اعلان شركة عربيات وكيل سيارات KGM الخاص بـ"توريس"، والحقيقة ان اعلانات الشركة دايما بتبقى مميزة ، لو فاكرين اول اعلان عن العلامة لمّا كان اسمها سانج يونج ، كانت الحملة تعريفية بالعلامة وانها من كوريا، بعدها كان الاعلان التاني ليها من بطولة الفنان الراحل سمير غانم، وفي شهر رمضان كان الاعلان الخاص بـ"توريس" بس المرة دي تحت علامة KGM مع الفنان سامي مغاوري.
توريس اول ما تم تقديمها في يوليو الماضي كانت أسعارها بتبدأ من مليون 750 الف لأول فئة لغاية 2 مليون 290 الف جنيه لأعلى فئة، وكان الدولار وقتها في السوق الموازي من شهر مايو لشهر يوليو 2023 كان وصل الى 45 جنيه، بس الدولار الجمركي كان بـ31 جنيه تقريبا.

توريس اليوم أسعارها بتبدأ من مليون و599 الف لأول فئة لغاية ميلون و999 الف جنيه لأعلى فئة، والدولار سعره تقريبا 47.5 جنيه، لكن الدولار الجمركي بنفس سعره في البنك.
توريس "كورية" عليها اجمالي رسوم وجمارك وضرائب 67% من سعرها، يعني لو حسبتها "ورقة وقلم" حتلاقي ان سعرها اليوم أقل من الطبيعي.
شركة KG mobility عندها طموحات كبيرة مع توريس، لأنها اول عربية تخرج بعد انتقال ملكية سانج يونج ليها، ولو شفت ارقام المبيعات الخاصة بسنة 2023 حتلاقي ان تقريبا مبيعات توريس لوحدها بتمثل تقريبا 40% من مبيعات المجموعة كلها (تيفولي وكوراندو وريكستون و XLV وغيرهم.
صحيح المبيعات لسة موصلتش لطموحات الشركة ، لكنها زادت عن سنة2022 بنسبة 93%، واعتقد ان سنة 2024 حتبقى سنة فاصلة في شركة KG mobility ، رغم انها بدأت بشكل "مش ولا بد".

ماهو برضه فكرة ان تبيع في بلد الغول "هيونداي- كيا" مش سهلة ، دخول السوق الصيني عايز "نينجا" فعلا ، وبقية الأسواق المنافسة فيها "ياروح ما بعدك روح".
بالمناسبة.. ده يمكن اللي خلّى الوكيل المصري يضغط وياخد أسعار كويسة جدا ، مكنته من النزول بالسعر بشكل اكثر من الطبيعي.