يعني الدولار ينزل بس على العربيات وأسعار قطع الغيار بنت البطة السودا؟!

اكتر من شهرين مروا على تحرير سعر الصرف، وانعكاس ده على سوق السيارات ظهر وبقى واضح للجميع ، الأفضلية للتجميع المحلي(CKD)، وتمويل وفتح الاعتمادات ع البحري لاستيراد مكونات الانتاج.

ده معناه ان عربيات الـCKD ح تبقى متوفرة طول الوقت في السوق ، وعدد الموديلات حيزيد تباعا ، وكلنا عارفين ان برنامج توطين الصناعة حيقدم حوافز لكل المصنعين كلَ حسب شريحته ، يعني دعم اكتر يترجم الى انخفاض في السعر اكتر

طب ايه الوضع الحالي وخلال 2024 بشكل عام؟

تاني.. حتفضل الحوكمة موجودة على السيارات المستوردة (CBU) ، والبيع حيتم من خلال المناطق الحرة (استيراد شخصي) وبعض الوكلاء اللّي حيقدروا يستوردوا بالشروط اللي حددتها الحكومة.

بناء عليه 2024 ح تكون سنة غبور بلا منازع، عمل تخفيضات حرّكت البيع عنده بشكل افضل من قبل ، عنده هيونداي النترا AD وشيري تيجو 4 برو، حينزلوا السوق خلال اسابيع معدودة، عشان يبقى عدد موديلات الـCKD الخاصة بمجموعة غبور 6 موديلات وكلهم في فئات سعرية مختلفة ومتواجدين في صالات العرض.

طب وبقية الشركات ؟

المنصور على وضعه ،مستحوذ على مبيعات العربيات التجارية وسايب شوية فكة لباقي الشركات، اما الملاكي فكل شغله CBU وبالتالي اعتقد ان المركز الأول السنة دي مش في حساباته، بس لو الـ3 موديلات الـCKD اللّي اعلن عنهم نزلوا في الربع الأول من 2025 حنشوف السنة الجاية منافسة "عجب".

نيسان وضعه ثابت ، افضليته في التصدير لأفريقيا وده يمكّنه انه يقدر يستورد من خلال الحصيلة التصديرية، بس زيادة في عدد مبيعات الـ"صنى" والـ"سينترا" ده حيتوقف على المنافسة السعرية مع غبور، بس اعتقادي انه حيكون في الترتيب التاني في 2024، ونشوف حيعلنوا عن موديل ثالث CKD في 2025 ولا لأ.

شركة الأمل - وكيل BYD- ربنا معاه، حيفضل يجمّع F3 لغاية امتى، كلنا عارفين انها واقفة من سنين وان تجميع الكهرباء صعب جدا، ده أصلا لو استمر معاه التوكيل.

بالمناسبة.. عمّالين نسمع عن انخفاضات في اسعار العربيات ،بس يبدو ان الشركات ناسية ان في كمان قطع غيار اسعارها خيالية ومحدش جاب سيرة انخفاض في اسعار قطع الغيار الا مجموعة IFG وكيل ساوايست.