اسلام حويلة يكتب :

خلاص مش ح نقول 330i ولا 525i ولا 760i ..مفيش حرف الـ"i" تاني

حرف الـ"i" سيخصص للموديلات الكهربائية

في سنة 1969 ظهر حرف الـ"i" على موديلات BMW لأول مرة ، لمّا قدمت الشركة أول عربية بخاصية حقن الوقود (انجيكشن) وكان الموديل اسمه 2000 tii ، ومع الوقت انتهى دور "الكاربراتير" من موديلات BMW تماما وتم اعتماد حرف الـ"i" في كل عربيات BMW البنزين ، وحرف الـ"D" للديزل.

في مايو 2023 بدأ الكلام وشائعات ان BMW في طريقها لتخصيص حرف الـ"i" للسيارات الكهربائية ومش حيكون موجود تاني على أي عربية بمحرك احتراق داخلي

ازاي.. يعني مش حنقول 330i ولا 520i ؟ يعني مش حنلاقي حد بينطق حرف الـ"i" ويتك عليه أوي عشان يفهمنا انه "بي ام باوي قديم"؟.. لا سيدي معدش الكلام ده.

بيرند كوربر، نائب الرئيس الأول لعلامة BMW وإدارة المنتجات طلع من يومين بتصريحات لـ BMW Blog حول الدوافع ورا التغيير ده ، وقال : رغم أن تفسيرنا لـBMW i كان دائمًا يتمحور حول الابتكار وليس فقط الكهرباء، إلا أننا قررنا الآن حجز هذا الحرف للدلالة على السيارات الكهربائية فقط، وذلك لتقليل الارتباك بين الطرازات مثل BMW i5، الكهربائية بالكامل، وBMW 540i التي تعمل بالبنزين، نود أن نحتفظ بـ 'i' كأصل، ونود أن نحتفظ به كتوقيع يدل على أنك تقود سيارة كهربائية، وكان هذا هو المنطق لدينا.

أول عربية حتخرج من BMW بدون حرف الـ"i" ح تكون X3 واللي حتخرج في الربع الأخير من 2024، وتحديدا حيتم استبدال موديل M40i بـ M50، وهكذا على كل العربيات ، بس خد بالك احنا بنتكلم على فيس ليفت أو جيل جديد كليا، مش موديل سنة جديدة، يعني مش حتلاقي حرف الـ"i" على الجيل الجديد من الفئة الأولى والفئة التانية اللي ح يظهروا في الربع الأخير من السنة.

بالمناسبة.. مبيعات الكهرباء لـBMW وMini زادت بنسبة 74% في2023 ،ده غير ان عام 2023 هو التاريخي لمجموعة BMW ،لأنهم حققوا رقم قياسي في المبيعات وقدروا يحققوا المركز الاول في مبيعات عربيات القطاع الفاخر