اسلام حويلة يكتب : الوكلاء والموزعين.. رينو وAGC تجديد شبكة التوزيع

اليومين اللي فاتوا كتبت عن العلاقة بين الوكيل والموزع، لكن تزامن ده مع تغييرات في شبكة الموزعين المعتمدين لرينو ، لا كان في بالي الموزع الفلاني ولا الوكيل العلاني ،لكن بما ان رينو بتضخ دماء جديدة في شبكة الموزعين يبقى خلينا نتكلم شوية عنها.

رينو كان عندها مجموعة عربيات من عيلة الـ"لوجان"، لوجان وستيب واي وسانديرو ، كانت عربيات بيّاعة ودايما ضمن الاختيارات في الشريحة السعرية دي، بانتهاء لوجان فقدت رينو حصة سوقية كبيرة ، ده غير ان المنافسة بقت اصعب بمراحل، مبيعات السوق أقل من السنين السابقة، وعربيات منافسة اكتر بكتير من قبل.

طبعا ناس كتير حتقولك الحق يا جدع،رينو وقعت ومش بتبيع زي الأول..ماشي ماهو مش كل الناس مطلوب منها إنها تفهم.

الموضوع باختصار شديد ان رينو قررت بعد جائحة كورونا تغير الاستراتيجية بتاعتها كليا، وعملوا خطة من مراحل وأهداف اسمها Renaulution "رينوشن" ملخصها نقل الشركة من الحجم الى القيمة، يعني العدد في اللمون ده نسيبه للي عايز، احنا مش بتوع عربيات ف بنستخدم التكنولوجيا، ابسلوتلي ،احنا بتوع تكنولوجيا بنستخدمها في العربيات ، وده نص اللي قاله لوكا دي ميو الرئيس التنفيذي لمجموعة رينو: "سننتقل من شركة سيارات تعمل بالتكنولوجيا إلى شركة تكنولوجيا تعمل بالسيارات".

نرجع تاني لرينو مصر وشبكة الموزعين ،العربيات اللي جاية من المغرب سواء تاليانت أو كارديان أو غيرها غير "لوجان واخواتها"، لا السعر هو ولا حتى العربية نفسها، وبالتالي - وده اعتقادي – ان ادارة رينو شافت ان استراتيجية المبيعات لازم تتغير، وبالتالي ضخ دماء جديدة في شبكة الموزعين.

معنديش للأسف معرفة مباشرة بالموزعين الجدد باستثناء موزع واحد ، لكن يبدو من الأسماء انهم ان جاز التعبير الكروي عليهم "ح ياكلوا النجيلة"، وبيشاركوا الوكيل تحقيق خطة الشركة العالمية في مصر.

ولو الموزعين الجدد بنفس قدرات الموزع المعتمد شركة AGC وبيديرها السيد سعيد جلال، يبقى رينو خلال سنتين تلاتة حتبقى في حتة تانية فعلا.

بالمناسبة.. ياريت الناس تحترم اماكن شحن العربيات الكهرباء وتسيبها للي عايز يشحن .. مرسيدس الـEQE عايزة كتابة على نار هادية