الخلاصة : عايز تنجح ؟ بص في ورقتك!

ليه مفيش تقريبا عربياتBMW في السوق الموازي؟ 

خد بالك من كلمة تقريبا.. بالتأكيد في عربيات لكن أعدادها ضعيفة ، مع ان الاستيراد الشخصي خلال النصف الأول من 2024 بلغ حوالي 45 الف عربية يعني ضعف استيراد الوكلاء.. مع الاخذ في الاعتبار ان مبادرة سيارات المصريين بالخارج بره الأرقام دي خالص، لوحدها تقريبا 68 الف عربية.

كتير من الوكلا اشتكوا بشكل مباشر من تضرر عملياتهم بسبب الاستيراد غير المنظم والعشوائي وان كتير من العربيات دي غير مطابق للمواصفات.

ودي كانت نقطة مهمة جدا أثيرت أثناء الجلسة الحوارية مع السيد محمد قنديل الرئيس التنفيذي لشركة جلوبال اوتو – وكيل BMW و Mini في مصر- او المائدة المستديرة مع مجموعة من الاعلاميين المتخصصين في السيارات.

السيد محمد قنديل قال بالنص : "أنا من المؤمنين بحرية البيزنس، اللي يستورد.. يستورد ، السوق مفتوح ،لا يوجد ما يمنع أي تاجر من الاستيراد ، "بص في ورقتك".. انا دايما باصص في ورقتي ومركز في شغلي ، ومش شاغل بالي بمين بيعمل ايه او بيستورد ايه .. اللي يقدر ينافسنى أهلا بيه"

واضاف ، بيساعدنا في ده الطريقة اللي بنشتغل بيها ، العروض اللي بنقدمها ، 5 سنين ضمان وخدمة 3 سنوات بالاضافة لمزايا أخرى وبالتالي معتقدش ان التاجر يقدر يقدمها.. نقوم بالتسعير بشكل جيد جدا ، نقوم بتقديم خدمات مناسبة جدا ، نعامل العميل معاملة راقية تليق بيه ، وبالتالي لا أعتقد ان في استطاعة أي مستورد ان ينافس.

طبعا موضوعات كتير تم مناقشتها وتوضيحها خلال اللقاء، بس حبيت اكتب النهاردة عن النقطة دي تحديدا، لأنه مختلف عن الكلام الداير في سوق السيارات عن الاستيراد الشخصي.

بالمناسبة .. جلوبال أوتو بتحذر من شراء عربيات  i3وix3 BMW وارد الصين لأنها غير مطابقة لمواصفات السوق المصري.. ورغم التحذير، إلا انها حتقدم خدمات محدودة للصيانة فقط فى حدود المتاح ليها