تصويت اوروبا ضد الصين ..وترخيص دوجان وزاستافا 128 كهربا

يوم الجمعة قطاع السيارات العالمي كله منتظر نتيجة تصويت الاتحاد الأوروبي على قرار فرض جمارك تصل لـ45% على السيارات الكهربائية الصينية.

وغالبا حيتم التصويت لصالح القرار ، رغم ان كل شركات السيارات الأوروبية معارضة للقرار، وسبب معارضتهم خوفهم من ان الصين تاخد اجراءات مضادة تأثر على مبيعاتهم في السوق الصيني، اللي هو أهم سوق للسيارات الكهربائية ، وتقريبا نص مبيعات شركات السيارات الاوروبية في سوق الصين لوحده، يعني أي قرار صيني بالعقاب يبقى "خراب بيوت".

طب ايه تاثير ده على مصر؟

انا مبسوط انك سألت السؤال ده .. الإجابة .. ولا أيتها حاجة

لا الاستيراد مفتوح عشان نقول ان السوق حيغرق بسيارات كهربائية جاية من الصين أسعارها أرخص ، ولا في اهتمام من أصله بـ"بنية تحتية" تستوعب 2000 عربية كهرباء في السنة.

لكن اهتمام المستهلك بيزيد بالسيارات الكهربائية

ده صحيح لكنه اهتمام من بعيد لبعيد، حياخد وقت عشان يتحول من اهتمام الى رغبة حقيقية في الامتلاك ، وده مش رأيي، الارقام بتقول ده، تقرير المجمعة المصرية للتأمين قال ان عدد الملاكي الكهرباء اللي تم ترخيصه من 1 يوليو 2021 الى 31 أغسطس 2024 يعني في 3 سنين وشهر حوالي 7193 عربية.

ازاي ترخيص وانت بتقول حوالي.. تيجي ازاي؟

سيادتك لمّاح وبتلقطها .. بص يا عمونا ، في تقرير التراخيص في حاجات غريبة ومش مفهومة ، مثلا يعني في التقرير في عربية نصر دوجان كهرباء وزاستافا 128 وهيونداي اكسيل وفيرنا وشيفروليه لانوس وسوزوكي فان وكيا برايد وبتاع 200 موديل بدون اسم (Null)، ده غير ان في ماركات جوجل نفسه ميعرفش عنهم حاجة

عشان كده بقول حوالي

بالمناسبة دي .. أكتر عربية كهربا موجودة في مصر هي فولكسفاجن ID.4 بفئاتها بعدد 1177 وحدة وبعدها أختها ID.6 بفائتها بعدد 611 وحدة.