اسلام حويلة يكتب : الأمان في العربيات الصيني.. المشكل فينا مش فيهم

تعليقات كتير بنلاقيها على الأمان والسلامةالخاصة بالعربيات الصيني، أغلب التعليقات دي بتتكلم على انه مفيش أمان وإن المعيار أو المقياس عندهم هو اختبارات الأمان الاوروبية Euro Ncap ، وإن أكتر من 99% من العربيات الصيني في مصر وغيرها غير آمنة بحسب معاييرهم.

الصين عندها برنامج تقييم السيارات الجديدة (C-NCAP) وده واحد من الأعضاء التسعة في NCAP العالمية والأخير بيطبق معايير اختبارات التصادم الدنيا للأمم المتحدة.

برنامج الصين (C-NCAP) تم تحديثه وتحسينه 6 مرات من 2006 للنهاردة، وبقى يوازي برامج التقييم الأوروبية والأمريكية، ممكن حضرتك تستنكر ده وتشوف انهم بيتلاعبوا بالنتائج.. ده رأيك، لكن لازم تعرف ان دولة بحجم الصين (الأكبر في الانتاج وفي التصدير والمبيعات على العالم)موصلتش لده من فراغ ،الناس دي شغّالة ليل نهار عشان يبقوا على قمة التكنولوجيا في كل الفروع والمجالات، مش بيهزروا، والسوق المصري بتاعنا بالنسبة ليهم صفر ع الشمال.

وكل العلامات الاوروبية والامريكية بيحرصوا على اجراء الاختبارات فيه، مش عربيات صيني بس

وبرضه مهم انك تعرف ان كل المنظمات دي منظمات خيرية أهلية لا علاقة لها بحكومات وانظمة، يعني المسألة كلها مش الزامية، في اوروبا في معايير لدخول العربيات السوق، بمجرد ما دخلت تبقى مطابقة للمواصفات، سواء عملت اختبارات في Euro Ncap أو لأ، الاختبارات فيها جزء دعاية للشركة وفيها جزء لاختبار الشركة نفسها وازاي تطوّر من شغلها وتحسنه، في عربيات اوروبية اخدت نجمة واحدة وبتتباع عادي جدا في السوق الأوروبي، وكمان عربية امريكية شهيرة جدا لم تجتاز الاختبارات من أصله وبتتباع عادي برضه

وكمان الشركات الصينية مش حتعمل اختبارات الا لمّا تدخل السوق الاوروبي وتنافس، وعشان في اوروبييين ممكن يفكروا زي سعادتك فبعض الشركات عملت اختبارات واخدت 5 نجوم، زي اكسبنج وزيكر ولينك اند كو و نيو وMG وغيرها.

بس احنا بنشوف في مصر عجب عجاب نتيجة حوادث؟

ايوة طبعا ، بس المشكلة مش في الصين ، المشكلة في بعض التجميع المحلي غير المطابق للمواصفات ، يعني لمّا عربية واقف انتاجها من 15 سنة وبتتجمع في مصر من مكونات مصانع بير سلم في الصين مستني منها ايه مثلا؟

بالمناسبة .. عربية Rox اللي نازلة قريب مع وكيلها شركة نورالشريف واخدة 5 نجوم في الاختبارات واسم الموديل Jishi 01