مش موديل SUV محلي ..دول 3 موديلات وحتبقى "عركة" مبيعات

سنة 2025 غير السنين اللي فاتت ، من يناير حبتدأ "عركة" المبيعات، الفكرة ان السنة الجاية فيها تجميع محلي كتير، ومش جيل قديم، حتبقى أجيال جديدة.

توقعات الشركات ان مبيعات 2025 حتزيد على الأقل 25% بشرط الاستقرار والمقصود هنا سعر الدولار وفتح الـACID والاعتمادات البنكية.

لكن كان سؤالي المهم.. الزيادة المتوقعة في المبيعات جاية في أي شريحة سعرية؟

قبل الإجابة قلت أفكر معاكم .. الفئة C اللي كانت بتشتري من سنتين عربية آخرها 250 ألف جنيه، حاليا نفس العربية عدّت الـ800 ألف جنيه ، وطبعا الزيادة هنا لا تتناسب اطلاقا مع الزيادة في دخل مواطن هذه الفئة،اوعى تنسى فايدة البنك.

الفئة B المتوسطة ، انقسمت نصفين الأول نزل للفئة C والتاني "مسك العصاية من النص".. يعني توسان وسبورتاج وبعدهم بشوية بيجو وسكودا لو أخدناهم كمثل عميلهم مش قادر عليهم ، فنزل برضه لمرتبة أقل ورضي في حالة شرا عربية جديدة انه يركب كورولا مثلا.

الفئة A طبعا أغلبها ماسك نفسه، باستثناء الطبقة الدنيا، اللي نزلت وراحت لكودياك وتيجوان وتوسان وبيجو.."كله بيسلم بعضه يا بيه".

طب نجاوب على تساؤل.. زيادة المبيعات المتوقعة جاية في أي شريحة سعرية؟

ماهو طبيعي كل مبيعات الفئات تزيد.. مش محتاجة يعني؟

ده صحيح بس أقصد هنا أكثرية الزيادة المتوقعة

حسب متوسط توقعات الشركات، اكبر زيادة في المبيعات حتكون في الشريحة السعرية من 1.2 مليون الى 1.8 مليون جنيه.. وأغلبها حتكون SUV وبعدها بين الـ850 إلى 1.1 مليون جنيه وبعدها تحت الـ800 ألف جنيه.

طيب لمّا يكون عندنا 3 موديلات SUV تجميع محلي ونازلين خلال الربع الأول بجودة عالية وسعر بين 1.1 مليون و1.3 مليون يبقى ايه الموقف؟

الطبيعي نشوف هبد في اسعار موديلات SUV كتير وإلا حيكونوا بره السوق.

طب ايه همّا الموديلات الثلاثة؟

آه منك انت يا لئيم.. ما في حاجات لو قلناها قبل ميعادها تفقد رونقها، بس خليني اقولك ان منهم موديلين صيني والموديل الثالث غير صيني .. بكرة نكمّل