أسعار Exeed ..يجري في "حارة" ليه لمّا "الدائري" موجود

النهاردة كان الكلام في سوق العربيات عن أسعار موديلات علامة Exeed ، واللّي أثارت جدل ما بين مؤيد ومنتقد ، وكالعادة قلت نتكلم بشكل مرتب ونحاول نشوف وضع Exeed بالنسبة للسوق .

أسعار Exeed تبدأ من 2.38 إلى 3.38 مليون جنيه ، والشريحة السعرية دي (SUV) فيها 12 موديل بس، بيتقدموا عن طريق الوكلاء، بعد استبعاد العربيات الكهربا وآخر فئتين من سبورتاج وتوسان.

عدد مبيعات الشريحة السعرية دي وحسب تقرير تراخيص المرور من يناير إلى اكتوبر 2024 حوالي 8476 وحدة، منهم 5396 عربية سكودا كودياك وفولكسفاجن تيجوان رغم ان الأثنين شغّالين مناطق حرة وبالدولار ودي أصعب من ان العربية تتباع بالجنيه في المعارض، يتبقى حوالي 3080 عربية موزعة على 10 موديلات.

الموديلات همّا بيجو 5008 ،ألفاروميو تونالي،كوبرا فورمينتور، BMW X1، هيونداي سانتا في، كيا سورينتو،DS7، فولفو XC40 و ميني كانتريمان وأودي Q3.

لو استبعدنا ميني وكوبرا والفا روميو تحديدا لأن عملاؤهم مش داخلين في مقارنة، يعني عميل ميني مراحش اشتراها عشان قارنها بعربية تانية ، ده رايح لميني على طول ،ونفس الشيء كوبرا والفاروميو.

شركة Exeed شايفة ان منافيسها همّا "الفواخر"، يعني X1 و Q3، يمكن ده ينطبق على أسواق تانية، بس عندنا وعلى أرض الواقع انا شايف انهم نازلين ياخدوا من كودياك وتيجوان تحديدا ، ماهو مش حيجّمع ويستثمر عشان يجري في "حارة" ما "الدائري" موجود.

في 4 موديلات بينزلوا أو في فئة منهم بتنزل بـ7 مقاعد ، طبعا مفيش احصاء لمبيعات فئات كل موديل عشان نعرف نحدد عدد مبيعات فئة الـ7 مقاعد، يمكن اللّي بينزل بفئة وحيدة 7 مقاعد، سانتا في وسورنتو، وفي فئة من 5008 وكودياك بـ7 مقاعد.

نهايته.. هات م الآخر

لأ نهاية ايه.. أصل نزول Exeed ده حدث مهم جدا للسوق، يعني هل ح نشوف أنماط استهلاكية جديدة ؟

يا سيدي السعر كويس ولا لأ؟

يعني انت عايزني اشوف سعرها كام بره ، وتكلفة الشحن عشان هي SKD ، ولو كانت جت مستوردة كانت بقت بكام؟ حاضر.. بكرة عشان المساحة واكون زرت المصنع وشفت العربيات ع الطبيعة