أرقام وملاحظات من تراخيص أكتوبر.. وإعلان توكيل أومودا نهاية 2024

نكمل قراءة في تقرير تراخيص المرور من يناير ولحد أكتوبر 2024 ومقتصر بس على العربيات الملاكي "الركوب" ونكتب شوية ملاحظات فيها أرقام كتير..

في سنة 2024 تم ترخيص 118012 عربية ، تابعين لـ96 علامة تجارية، جنسية العلامات (Brands) كالتالي ، 30 علامة اوروبية و 43 صينية، 8 علامات يابانية و5 كورية و7 أمريكية و1 روسية و1 ماليزية ، باجمالي عدد 432 موديل تم ترخيصهم حسب التقرير.

لما تيجي تشوف الأرقام بعد استبعاد كل الـCKD و الـSKD (التجميع المحلي)  حنلاقي الأوروبي مسيطر على التراخيص ، العلامات الاوروبية رخّصت 33500 وحدة تقريبا، نصهم تقريبا (15100 وحدة) لعلامات "الفواخر" ودي نسبة بتثير تساؤل عندي.. ايه موقف باقي العلامات الاوروبية السنين الجاية؟ أو يا اوروبي فاخر يا إما أغيّر لحاجة تانية؟ محتاجة موضوع لوحده دي

العلامات الصينية حنلاقيها رخّصت 20747 وحدة، رغم كل الصخب والبروباجندا ، مهم جدا تعرف ان MG لوحدها واخدة منهم أكثر من 9 آلاف عربية ، ولو زوّدت عليهم عربيتين شيري الاستيراد يبقى نص مبيعات الصيني المستورد كله ، يعني الـ41 علامة يا دوب محققين نص المبيعات. 

العلامات الكورية رخّصت 17517 وحدة ، بس لاحظ اننا بنتكلم على 3 علامات رئيسية (هيونداي وكيا وKGM) عندنا 12عربية دايو – أيوة متستغربش- و25 عربية جينيسيس، سبورتاج وتوسان لوحدهم 9913 وحدة يعني اكثر من نص مبيعات الكوري.

أما الياباني بعلاماته الـ8 فرخّص 16747 وحدة، بس برضه همّا 4 علامات شغّالة والباقي مش مؤثرين ، مازدا رخّصت 6 عربيات ومحسوبة علامة.

نيجي لآخر حاجة النهاردة.. والكلام لسة على تقرير تراخيص سنة 2024 حنلاقي ان علامة رولزرويس رخّصت 11عربية ، لامبورجيني 15 ، فيراري 12،استون مارتن 2، لكزس 20، بنتلي 27، مازيراتي 40، ماكلارين عربية واحدة.

بالمناسبة.. علامة "جايكو- أومودا" في آخر مرحلة من المفاوضات مع شركة مصرية شهيرة وعندها عدد محترم من التوكيلات، والمخطط انه يتم توقيع العقد نهاية السنة والإعلان عنه.