اسلام حويلة يكتب :

سنة 2025 مهمة جدا للعربيات الكهرباء في مصر.. و ROX حتتقدم خلال أيام

Rox 01

⚡️تراخيص العربيات الكهرباء في شهر نوفمبر 497 وحدة ، يعني قلّت 129 عربية عن تراخيص شهر أكتوبر (626وحدة)، خد بالك سوق العربيات الكهرباء فوضوي ، متقدرش تحكم عليه أو تحلله بطريقة مناسبة، لكن تقدر تقول ان سنة 2025 سنة مهمة جدا للقطاع ده.

طب ليه سنة 2025؟🤔

1️⃣أولا : لان الاستيراد الشخصي اتقفل تقريبا، والمستوردين كانوا شغّالين يوم بيومه، يجيبوا شوية عربيات يبيعوها ويبعتوا يجيبوا غيرها، والوكلاء كانوا موجودين على استيحاء ، ومفيش وكيل يقدر ينافس عربيات جاية من الصين عليها دعم حكومي بيوصل لـ10آلاف دولار، انت متخيل مكسب المستورد كام في العربية الواحدة؟

2️⃣ثانيا : الوكلاء حيقدموا عربيات كهرباء كتير في 2025 ، فولفو بدأت وعندها 3 عربيات كمان ،وعندنا سمارت في نهاية يناير وبعدها زيكر ولينك اند كو وهيونداي ايونيك ونيتا، وعندنا اوروبي بيجو وستروين ورينو، يعني تشكيلة كبيرة من العربيات الكهرباء حنشوفها تباعا السنة الجاية ، برضه خد بالك انا بكلمك عن عربيات Full Ev ده غير الـ EREV اللّي حنلاقيها في عربيات كتير، زي ROX وغيره.

بس مش معنى كده ان العربيات الكهرباء حتنتشر أوي، حتفضل أغلب العربيات الكهرباء تتباع كـ" second car"، عربية البنت او الزوجة، مشاوير لطيفة ونرجع نشحنها تاني.🔌

كل ما زاد مدى سير البطارية زاد سعرها ، يعني عايزة عربية مدى 600 كيلومتر تعيش حياتك بيها ،مش أقل من 60 ألف دولار.

👈بس عشان نبقى عمليين، لازم تكون عارف ان أكبر مسافة ممكن تقطعها في اليوم كام؟ من آخر أكتوبر للشروق أو مدينتي؟ 100 كيلومتر وزيهم راجع ، يعني 200 أو 250 كيلومتر حد أقصى للاستخدام اليومي، فكرة اننا عايزين كل حاجة بـ"الكيلو" دي مبقتش جايبة همّها.

🧐مشكلة العربيات الكهربا غالبا في طرق السفر، يعني لو طريق الساحل ومطروح فيه نقاط كافية للشحن، وزيهم الغردقة وشرم الشيخ ،كل التخوفات من العربيات الكهربا حتتلاشى.