تحالف ماسك و"ابوحنان".. اللي عايز يبيع عندنا يفتح مصنع ونقوله يا عمنا

فكرة تحالف نيسان وهوندا دي محاولة لانقاذ ما يمكن انقاذه، وكلها كام سنة وتويوتا ذات نفسها تعلن عن تحالف ياباني شامل، وغالبا التحالفات دي حتاخد اوروبا كلها في الرجلين.

اسمع يا عمونا.. الصين خلاص انطلقت ومفيش حد حيقدر يوقفها، فكرة انك تمتلك تلتين المعادن الأرضية النادرة والمكون الرئيسي لصناعة بطاريات السيارات أعطت الصين أفضلية تامة، وده اللي شافه ايلون ماسك من بدري، وعرف انه مهما عمل تسلا مش حتقدر تقف قدّام شركات الصين “نوهائيا”.

قالك مفيش غير المعلم ابوحنان هو الوحيد اللي يقدر يساعدني بس الاهم انه ينجح في الانتخابات، وحصل واتشكل تحالف بين الاثنين، واحد شغّال تطوير والتاني قفل السوق الامريكي على تسلا وشوية "فتات" لجنرال موتورز وفورد، اللي عايز يبيع عندنا يفتحلنا مصنع ونقوله يا عمنا.

اوروبا طبعا لا يد ولا حيلة فمشيت مع "اونكل امريكا" ورفعت الرسوم الجمركية بس على مين، الصين مكتسحة وشغّالة افتتاح مصانع ليها في اوروبا، والمواطن الاوروبي رافض فكرة انه يدفع اكتر وياخد تكنولوجيا وتوفير اقل، عشان كده فولكسفاجن عمّالة تقع وحتاخد وراها كل الاوروبي خلال الـ10 سنين الجاية.

نيسان وهوندا حسوا بالمسألة وشافوا ان مصيرهم الافلاس لو مالقوش حل على الأقل يأجل المسألة شوية لغاية ما يشوفوا كبير اليابان "تمّن" تويوتا حتعمل ايه في حكاية خلايا الهيدروجين.

بس على كده الكوري في أمان؟

كوري مين اللي في أمان، السوق الكوري كله على بعضه ميكفيش انتاج كيا لوحدها، سوق صغير بالمقارنة بالحيتان، ومع التدابير الوقائية في السوق الامريكي والاوروبي ، وعدم وجود تواجد للكوري في السوق الصيني فالمسألة وقت مش أكتر.

طب احنا اخبارنا ايه كسوق مصري؟

عيب عليك والله تسأل السؤال ده.. أقولك ابوحنان وماسك والمارد الصيني وتقولي موقف سوقنا ايه؟