علاقة جمال عبد الناصر بعلامة ميني الشهيرة .. خد سيف

"تؤمم الشركة العالمية لقناة السويس البحرية شركة مساهمة مصرية" الجملة دي قالها الرئيس الراحل جمال عبدالناصر في 26 يوليو عام 1956،وطبعا كلنا عارفين اتقالت ليه وحصل بعدها ايه.
لكن لك ان تعلم عزيزي القارئ ان الجملة كانت السبب الرئيسي في وجود سيارات ميني الشهيرة، وده مش كلامي ده كلام شركة ميني نفسها ، الهام فكرة ميني جه بعد أزمة السويس وارتفاع اسعار الوقود، الحكومة البريطانية اصدرت الأوامر لشركة المحركات البريطانية بالبدء في انتاج عربية اقتصادية في استهلاك الوقود ، وبعد اقل من 3 سنين يعني في 1959 خرجت اول عربية ميني في التاريخ ، وزنها 615 كيلوجرام ، وبتستهلك لتر بنزين لكل 16 كيلومتر ، سعرها 496 جنيه، لكن مكانش اسمها ميني في الاول ، كانت ميني احدى موديلات موريس، وتم اطلاق اسم موريس ميني عليها باعتبار انها "ميني عربية وكده" ، لكن الغريب ان اسم ميني هو اللي فضل وكبر وبقى من علامات السيارات الشهيرة، لدرجة انها باعت 2 مليون نسخة في اقل من 10 سنين، ووصلت لـ4 ملايين نسخة في سنة 1977.

خد سيف وكمان سيف .. هات النص التاني

في بتاع 15 سنة حصل فيهم "لخبطة" وخساير وبيع لشركة وبعدها شركة لغاية ما استقرت ميني في أحضان البافاري BMW اللي قرر ان ميني تبقى حاجة تانية خالص بس بنفس الروح القديمة، وفي سنة 1999 بدأ عهد جديد لميني بمفهوم مختلف.
وبدات رحلة نجاح واستكمال لتاريخ ، موديلات عصرية ومواكبة التطور، انهت فكرة ان ميني عربية اقتصادية ، ميني بقت عربية "الشقاوة" الدلع المرح ، قول زي ما تحب في السكة دي ، وبقت عربية حلم لأغلب الناس ، وخاصة النساء.
طبعا انا بكتب عن ميني بمناسبة تقديم الجيل الجديد من كانتري مان في مصر خلال ساعات ، لكن حبيت ابدأ الأول بمقدمة وبكرة اكتب عن كانتري مان عشان المساحة.
بالمناسبة.. ميني جت في المركز التاني بعد فورد موديل T في جائزة سيارة القرن العشرين من بين 700 عربية كانت مرشحة للحصول على الجايزة

إقرأ أيضا للكاتب اسلام حويلة :

ميني كانتري مان الجديدة .. لأول مرة من ألمانيا وكهربا كمان