دولارات رأس الحكمة وأسعار السيارات.. "اللّي اتلسع من الشوربة"

أيوة بقى .. 10 مليار الاسبوع الجاي و14 خلال شهرين ، و11 مليار في صورة ودائع اتشالوا من الديون.. نفوق بقى و"نروّق" على نفسنا.

طبعا زباين كتير مستنية اسعار السيارات تنزل .. ووكلا مستنيين الاستيراد يفتح ، وتجّار "متضايقين" عشان مفيش اوفر برايس بعد النهاردة.

ف إيه ممكن يحصل في سوق السيارات؟

احنا نشوف الصورة ونرسم سيناريو ايه ممكن يحصل..

رد فعل دولار الدهب والسوق الموازي كان سريع وحصل انخفاض في سويعات ، بس متصدقش اوي ، لان الصدمة كانت مفاجئة وغير متوقعة سواء لتجّار العملة أو حتى للأفراد "مكتنزي" الدولار، ومحدش "لحق" يبيع او يشتري.

الكل مستنى الاسبوع الجاي ، هل ح يحصل تحريك لسعر العملة "تعويم"، أو ح يتم الافراج عن البضائع في الموانئ ، هل ح تفتح البنوك اعتمادات "سيكة"؟

لو مفيش حاجة حصلت يبقى على وضعنا وزي ما احنا

طب نفترض ان كل ده حصل ، ح يحصل نوع من البانك والهلع عند الافراد وكله ح يجري يبيع وكله "حيلبس"

طب تفتكر السيارات ليها نصيب ؟

مفيش حد مش حيدوق من التورتة ، بس مين ونصيبه ايه ، ده المهم، اعتقد مكونات التصنيع ح تفتح بشكل أفضل بكتير من الحالي بس برضه مش حتوصل لقبل مارس2021 أبدا.

طب استيراد السيارات ؟

"اللي اتلسع من الشوربة" ، فكرة انك تسمح باستيراد سيارات بشكل شخصي من غير تقنين ده ح يساهم مرة تانية في زيادة الطلب على الدولار ، ولازم يتحط شرط او قانون يلزم الشخص بالكشف عن مصدر النقد الاجنبي ، لو مشروع يبقى حلال عليه ، غير كده يتعرض للمسائلة القانونية.

طب بالنسبة للشركات؟

اعتقد برضه نفس الشروط الحالية للاستيراد ح تكون الاساس ، الشركات بتعرف تستورد ، صحيح الكميات ضئيلة جدا بسبب قلة الاعتمادات ، لكن ح يحصل انفراجة نسبية عن الأول

بالمناسبة.. بالتعاون مع زملائي ، تم الاتفاق على دعم أي شركة سيارات تعلن عن تخفيض في الأسعار فور هبوط  سعر الدولار الموازي