اسعار فبراير اتلغت.. منتظرين اسعار يناير بقى

في حالة من الاحتفاء في سوق السيارات باللي حصل اليوم من مجموعة القصراوي، فكرة انه يبادر بخفض الأسعار وبنسبة معقولة هو شيء جيد بلا شك ، لأن مجموعة القصراوي تعتبر من "الكبار" في السوق.
صحيح همّا تقريبا لغوا زيادات شهر فبراير المفزعة ورجعت الأسعار زي شهر يناير، بس دي خطوة في طريق عودة الاسعار لطبيعتها، وانا متفهم الحذر الشديد من جانب الوكلاء في التخفيض الشديد للاسعار ، لان محدش عارف بكرة في ايه.
دولار السوق السوداء وصل للذروة 72 جنيه في الاسبوع الاول من فبراير ، وتم التسعير عليه ، اما في الاسبوع الاول من يناير كان وصل 55 جنيه يعني بينه وبين سعر النهاردة حوالي 8 جنيه .. يعني لسة من المفترض في نزول كمان لأسعار السيارات.

نسيب الاسعار في مصر ونطلع ع الصين نشوف مبيعات فبراير عاملة ايه؟

الرسم اللي تحت موضح اكتر 10 علامات مبيعا في السوق الصيني، طبعا انت عايز تعرف ايه همّا الـ10 شركات ، فأنا قلت انزل الرسم بالصيني اليوم ، وبكرة نتكلم عنه بالتفصيل مع الـtop 10 الاكثر مبيعا من الموديلات الكهربائية.
الرسم في ملاحظة مهمة جدا ، ان تقريبا الشركات كلها عندها انخفاض في المبيعات باستثناء شركة واحدة حققت طفرة كبيرة في المبيعات عن فبراير 23 وبنسبة 45.9%.
الملاحظة التانية المهمة، ان الـ10 شركات منهم 5 بس صيني والـ5 التانيين علامات اجنبية، يعني السوق المهول ده بعدد شركاته الوطنية اللي تجاوز الآلاف ، تفضل الشركات الكبيرة بس هي المتواجدة في قايمة الـTop 10 ، حتى الخمس علامات الأجنبية في القايمة منهم 4 داخلين في شراكات مع شركات صينية ، بس تفضل شركة واقفة بطولها بدون شريك صيني- كان موجود وانتهى- وكمان الشركة دي مصنّفة كعلامة للسيارات الفاخرة ،يعني وقت ما كتبت مقالة قبل كده بعنوان : من الذي لا يحب BMW .. مكنتش ببالغ ولا حاجة.
بالمناسبة.. مجموعة كبرى حتطرح سيارات كهربائية ممتازة بعد العيد على طول، عربيات ليها اسم وتاريخ ووكيل وتعتبر المنافس الرئيسي لفولكس فاجن ID4 ، ودي حتكون بداية نهاية الاستيراد الموازي لانها حتشجع بقية الكبار.