خد يا مواطن هنا.. رايح فين.. MG4 الكهربا نازلة مصر

تقدر تقول ان عهد المنافسة في السيارات الكهربائية بدأ في مصر، سيبك من شوية العربيات اللي بتنزل استيراد شخصي، المهم طرح الوكلاء للعربيات دي في مصر واللي يتبعه من خدمات سواء في الخدمة والصيانة أو حتى المساهمة في البنية التحتية.

المرة دي الموعد مع المنصور MG ، اللّي حيقدموا MG4 الكهربائية لأول مرة في السوق المصري، وبالتأكيد موعدها حيكون بعد العيد وبدقة اكثر حيكون في نهاية أبريل.

MG4 ممكن تقول عليها انها أهم عربية عند مجموعة saic الصينية ، لأنها أول عربية تخرج من أحدث منصات المجموعة، منصة MSP الذكية ، يعني باكورة التطوير والبحث تم وضعها في المنصة دي، وطبيعي ان عربية زيها ، تظهر لأول مرة في موطنها الأصلي "انجلترا"، وطبيعي برضه انها طالما اتقدمت في انجلترا يبقى اجتازت اختبارات السلامة والامان Euro N cap بتصنيف 5 نجوم.

باعت مجموعة SAIC اجمالي 5.02 مليون عربية في 2023، عشان تحافظ على مكانتها كأكبر بائع في الصين للعام الـ18 ع التوالي، ووصلت مبيعاتها الخارجية لـ1.208 مليون عربية ، وفي اوروبا باعت اكتر من250 ألف عربية ، وأكثر من 300 ألف في الأمريكتين

طبعا حيطلع واحد فاهم يقولك انت ح تفتي في دي كمان؟ ما كله عارف ان BYD اكبر شركة بيع في الصين

يا مواطن، مجموعة saic عندها علامات كتير و MG واحدة منهم ، وكمان كل الموديلات اللي بتطلع من مصانعها تحت علامة جنرال موتورز وفولكسفاجن بيتم احتسابهم كمبيعات للمجموعة، دي مش حسبتي انا دي حسبتهم هناك في الصين.. ابقى اسالهم همّا مش أنا.

العربية MG4 متواجدة في أكثر من 80 دولة وحصلت على أكثر من 30 جايزة رسمية ، منهم "سيارة العام" في بريطانيا وفرنسا وألمانيا وأستراليا ، وباعت بعد سنة تقريبا من نزولها أوروبا أكثر من 62 الف عربية

بالمناسبة.. MG 4 هي نفسها إم جي مولان اللي تم تقديمها في الصين من فترة، لكنها خارج الصين بيتم طرحها بإسم MG4.