قائمة نيسان.. وموجة ارتفاعات جاية في أسعار العربيات

امس نيسان مصر أعلنت عن قائمة أسعار موديلاتها ، وحصل احتفاء كبير بالاسعار المعلنة رغم انها هي هي نفس الاسعار منزلتش ولا طلعت وفضلت ثابتة.

في ابريل 2021 كان سعر أعلى فئة من صني 230.5 الف جنيه وكان الدولار بـ15.75 جنيه. وفي ابريل 2024 وصل سعرها لـ761 ألف جنيه وسعر الدولار تقريبا بـ47.5 جنيه.. ومع الأخذ في الاعتبار ان موديل كل سنة بيزيد سعره وده عرف في شركات السيارات في العالم تكون نيسان حافظت على سعر صني.

نيسان قشقاي اول ما نزلت في يناير2022 كانت أعلى فئة بـ505 الف جنيه وسعر الدولار 15.75 جنيه، واليوم سعرها 1477500 جنيه والدولار بـ47.5 جنيه ، يعني بحسبة الثلاث أضعاف – سعر الجنيه امام الدولار- هي أرخص من وقت ما نزلت السوق.

يبقى تقدر تقول ان نيسان عندها نظام التسعير محترم ومختلفش في الـ3 سنين.

وده في رأيي مؤشر غير جيد للمرحلة الجاية .. إزاي يا جدع؟

من بداية تحرير سعر الصرف وصل الدولار هبوطا الى اقصى نقطة وكانت 46.65 جنيه تقريبا، ورجع طلع لمستوى الـ47.5 جنيه وتقريبا فضل ثابت عليه تقريبا اسبوعين او شوية طلوع قروش.

ولمّا تسأل أي شركة ..هل اتفتح اعمادات بنكية لعربيات مستوردة؟

يكون الجواب : لأ قاطعة مانعة.. مكونات انتاج بس

وده أمر متوقع في ظل ظروف اقتصادية عنيفة وظروف جيوسياسية أعنف حوالينا في كل مكان.

الأهم من معرفة سعر الدولار حتى لو وصل 40 جنيه هو هل تم فتح اعتمادات للاستيراد؟ طول مفيش اعتمادات يبقى سعر الدولار كأن لم يكن في سوق السيارات..

يبقى احنا امام امرين.. الأول ان الانتاج المحلي يزيد بدرجة تكفى السوق وبالتالي مش حيبقى امام المستورد الا انه ينزل الأسعار وتحصل منافسة وده مش حيحصل ع الاقل خلال 2024.

الأمر التاني هو بقاء الوضع على ماهو عليه بالنسبة للاسعار، واللي مش عاجبه المحلي وعايز يشتري، ياخد بعضه وع المنطقة الحرة ويستورد شخصي بالدولار، وهو وشطارته في التدبير.. وده الغالب

طب استمرار الوضع ده معناه ايه؟

طب هو ليه الاسعار منزلتش؟ ماهو نفس سبب ليه الاسعار رفعت؟

بالمناسبة.. أغلب الشركات شغالين منطقة حرة يعني سعر العربيات بالدولار، فمش فارقة يطلع او ينزل قدام الجنيه.