بداية حرب الاسعار (2) .. تيجو8 والمنافسين وقشقاي والـSUV

حقولها عاشر.. طول ما العربيات مش متوفرة تبقى الأسعار مجرد شكليات ، طب لو اتوفرت ايه الموقف؟

الشركات اللي تقدر تستورد معدودة ، وكمان كميات العربيات دي بتبقى يا دوب تجيب تكاليف الكهربا وجزء من المرتبات.

أهم عربيات تم اعلان اسعارها في الفترة الأخيرة في رأيي بعيدا عن نيسان صني وهيونداي اكسنت RB همّا شيري تيجو 8 ونيسان قشقاي، الأولى فئة الـ7 مقاعد ، والتانية تقريبا هي الوحيدة المتوفرة بأعداد كبيرة ،وغير التوافر سعرها أقل من منافسيها بكتير.

فئة الـ7 مقاعد بتنمو مبيعاتها باستمرار ، وعربيات الفئة دي قليلة أبرزها جيتور X70 وشيفروليه كابتيفا ، ومع نزول سعر تيجو8 أعتقد انها حتتسيد مبيعات الفئة حتى إشعار آخر ، اللي هو استغلال وكلاء الشركات الصينية لحالة السوق الصيني من ركود كبير وامتلاء المخازن عندهم والضغط للحصول على تخفيض سعري كبير كميزة تنافسية، وطبعا قبل كده انك تعرف تستورد.

نيسان قشقاي كون انها تبدأ من مليون و400 الف جنيه والمنافسين أغلى بـ250 ألف ع الأقل، وأفصلية نيسان مصر في الاستيراد بسبب وجود حصيلة تصدير مكنها انها تستورد اعداد كبيرة، ده يخليها في مكان لوحدها، وده كفيل انك تلاقي بمجرد توافر عربيات منافسة اسعار بتنزل.

طب والاوروبي ؟

الوضع صعب جدا للاوروبي كله ، باستثناء BMW عندهم مصنع وتجميع وموديلات جديدة ، لو حتتكلم عن منافسيها ، مرسيدس همّا موديلين اثنين بس بيتجمعوا ،واودي وبورشة، مفيش قدامك غير المنطقة الحرة، يعني الساحة فاضية من المنافسين.

لأ يا مولانا BMW ايه .. خلينا تحت ؟

تقريبا كله بيتساوى ، يمكن افضلية لأوبل وستروين بس عشان في شوية عربيات بيتم استيرادها، لكن سكودا وسيات وفيات وبيجو ورينو وفولكسفاجن وغيره، كلهم في نفس الموقف

بالمناسبة.. اول ما الدولة تعلن عن دخول الـ20 مليار دولار الباقية من صفقة راس الحكمة ، السوق حيتحرك بسرعة كبيرة ،سواء سعر الدولار نزل او فضل ثابت.