اسلام حويلة يكتب : سوزوكي جيمني 5doors في حتة لوحدها

كانت المشكلة اللي بتواجه كتير من الناس في جيمني انها بابين بس، وده معناه مساحة أصغر، والركوب والنزول من الكنبة الخلفية برضه بيبقى مشكلة لكتير، كمان مساحة التخزين صغيرة، ورغم ده قدرت جيمني تحقق مبيعات ممتازة في العالم، واعتبرتها سوزوكي التيمة بتاعتها ،حتى لمّا حصل التعاون بين تويوتا وسوزوكي وان العربيات تطلع من المصنع نصها عليها علامة سوزوكي والنص التاني تويوتا زي سياز وبلتا، زي روميون وإرتيجا، لكن وصلوا عند جيمني وسوزوكي رفضت رفض قاطع ،لو فيها جيمني أو سويفت بلاها شراكة.

اسم جيمني طلع سنة 1998، لكن العربية نفسها موجودة من 1970 واطلق عليها كذا اسم قبل ما يثبت اسم جيمني عليها.
في النص التاني من الستينات اشترت شركة سوزوكي عربية اسمها شتاير بوش هافينجر وقعدوا يدرسوها عشان يدخلوا قطاع الدفع الرباعي ، ويادوب همّا سنتين ولقوا فرصة دهبية قدّامهم.

شركة الأمل لصناعة السيارات، مش الأمل بتاعةBYD دي شركة يابانية قديمة جدا واسمها بالانجليزي Hopeوكان عندها عربية "صغنططة" للطرق الوعرة وكان اسمها HopeStar ON360 لكن الشركة أفلست.

سوزوكي مكدبتش خبر وقامت شارية الشركة بالعربية وعملت شوية تطوير وقدمت أول عربية دفع رباعي سنة 1970 باسم جيب لايت 10 بمحرك 360 سي سي ، 2 سلندر،تبريد هواء زي فولكسفاجن بيتلز كده.

وبمرور الوقت اتطورت العربية لغاية ما صدر جيل جديد تحت اسم جيمنى سنة 1998،واتطور لغاية ما بدأ مصنع سوزوكي الهند انتاج النسخة الـ5 أبواب من جيمني في اكتوبر 2023.

جيمني 5 ابواب وصلت مصر عن طريق وكيلها مودرن موتورز، واعتقادي ان العربية دي لو توفرت ح تحقق مبيعات كبيرة ، لأنها في حتة لوحدها.

مين بينافسها؟ محدش
فين العربية الـ4X4 اللي زيها؟ مفيش

يعني لو انت عندك مزرعة ورايح جاي عليها ،وبتمشي في "مدقات" كان اختيارك جيب ، ولمّا وقف انتاجها ظهرت الـ"فورتشنر" وبقت هي الوحيدة في الحتة دي، طبعا مفيش مقارنة بين دي وجيمني ، بس لمّا يكون قدّامك عربية بتقضى الغرض وسعرها النص واستهلاكها للبنزين لا يذكر، وكمان ستايل مختلف أعتقد حسبتك ح تختلف