اسلام حويلة يكتب : القواعد الـ7 قبل ما تشتري مرسيدس EQE SUV

فكرة السيارات الكهربائية لسة جديدة علينا في مصر، حتى لو بقالها 3 سنين بتيجي من بره، لكن في النهاية عددها محدود جدا جدا مقارنة بمحركات الـICE اللي عددها في مصر يتجاوزالـ12 ميليون عربية، مرسيدس بنز ايجيبت قررت انها تطرح مجموعة من موديلاتها الكهربائية في مصر وتقدم مجموعة من الباقات للعملاء منها مثلا تركيب شاحن منزلي وغيرها كتير.

مكتب مرسيدس مشكورا وجه الدعوة لـ"مارشدير" لاجراء اختبار قيادة لمرسيدس EQE SUV الجديدة في مصر وكانت الحروف التالية ابرز ملاحظاتنا

1 : متنزلش وسط البلد

أحيانا بتحتاج"تركن" حاجات عشان تعرف تمشي ،منها مثلا فرامل الطوارئ ،انت متخيل انك تنسى "توقفها" وانت في وسط البلد، ده معناه انك حتلاقي فرملة عنيفة حصلت ونتيجتها ان الشارع كله يبص عليك وانت ذات نفسك دمك هرب وانت معتقد انك خبطت حد، بس ده في المرة الأولى بس، صدقنى حتاخد عليها بعد كده.

2 : ح تتاخد ردار

صعب جدا انك تظبط الكروز كنترول كل شوية، يعني من شارع لطريق لبطىء لسريع، أكيد حتنسى، والأغلب كمان حتنسى انك تجاوزت السرعة المحددة وح تتاخد رادار، اصلا مش ح تحس أبدا بالسرعة الا لمّا تشوف العداد غيركده انسى ،نظام التعليق وثبات واتزان وعزل العربية حالفين بالطلاق تتاخد رادار.

3 : ح تطلع شقاوة قديمة

فكرة التسارع في العربيات الكهربا مذهلة،وكل ما زاد العزم والقوة كان التسارع أقوى، ده من وضع السكون توصل الـ100 في اقل من 5 ثواني، لكن مع "الكيك داون" وانت ماشي على 100 حاجة تانية خالص ، 408 حصان بقى حترجع شباب وتطلّع الشقاوة القديمة.

4: تطبيق Mercedes Me مش شغّال

تطبيق Mercedes Me مش شغّال في أغلب الشرق الأوسط ممكن بس في ابوظبي ودبي، فكرة ان عربيتك تتحرك من الجراش لغاية عندك وانك تسيبها تركن "هي عارفة طريقها" واتصالك بأجهزة بيتك والاوامر الصوتية وكل الحركات دي تشوفها وانت في مصر ع اليوتيوب .. غير كده لأ.

5 : الحقيقة أحلى من الصورة

لمّا تشوف صورة لـEQE SUV من جوه ح تنبهر، لكن صدقنى ح تنبهر أكتر لو شفتها ع الطبيعة وبالذات لو في مكان مظلم ، النجوم والليد والشاشة وعلامة مرسيدس انت في سينما، الـ MBUX Hyperscreenمرعبة.

6 : مش حتحتاج شحن سريع

مدى بطارية EQE SUV الرسمي 598 كيلومتر ،لكن ده في الجنة، ع الأرض ممكن توصل لـ500 كيلومتر ،وده مدى كبير جدا في الزمن ده، ممكن مع الوقت يبقى "مالوش عازة" تكنولوجيا البطاريات في تطور سريع جدا ، لكن في الوقت الحالي ده ممتاز، ومش ح تحتاج انك تشحن سريع، مرسيدس بتركب لك وحدة شحن منزلي AC مجانا ،ولا يفضل اصلا انك تشحن سريع حفاظا على عمر البطارية.

7 : ظهرك مش ح يوجعك

دايما حتكون مسمتع وانت سايق ، في زحمة او طرق سريع، مسافة قصيرة او طويلة، لان كراسي العربية مش عادية ،الكرسي حيتظبط على ظهرك و ح "يحضنك" تقدر تظبط كل اتجاه بحيث تكون مرتاح جدا، طبعا تدفئة ومساج باوضاع متعددة، في منقي للهواء يعني مش بس راحة.. وانتعاش كمان.

بالمناسبة .. مرسيدس EQE SUV بتنزل في فئة واحد بسعر 5 مليون و400 الف جنيه ، ضمان 10 سنين او250 الف كيلومتر ع البطارية مع خدمة متكاملة صالحة لمدة 6 سنوات وعدد غير محدود من الكيلومتر