اسلام حويلة يكتب : تجربتى في قيادة نيسان اكستريل ePower من غير زعل

من وقت قررت نيسان مصر تبعتلي اكستريل عشان تجربة القيادة عليها وانا بأفكر ممكن يتكتب عليها ايه متكتبش، او يتقال عليها ايه متقالش، حقيقي المواصفات “اتهرست” على ايد زملاء شاطرين، الكلام عن التصميم والتعريف بالتكنولوجيا والمميزات، كلام كتير الناس عارفاه.. فحاولت اكتب حاجة ممكن تكون مختلفة نوعا ما زي ما الناس منتظرة منى المختلف دايما… يالا بينا

هو ايه الموديل المنافس لـ"نيسان اكستريل" في السوق المصري؟

أو بمعنى أدق ممكن نقارن نيسان اكستريل بـ"إيه" ؟
نظريا وع الورق مفيش لكذا سبب أولهم انها كهرباء بتكنولوجيا مش موجودة عن حد، يعني مش محتاجة تشحن ،وفي نفس الوقت مش هايبريد ف بتبدّل ما بين الكهرباء والبنزين، لكن عمليا وحسب تفكير عملاء كتير ،في أكتر من منافس، لكن حسبتك حتختلف باختلاف وجه المقارنة.
تقصد تقول ايه يا حضرة الزميل؟
تعالى نمسك حتة حتة ونوضحها..

ايه الـ DNA بتاع نيسان اكستريل؟

-    تكنولوجيا الـePower يعني عربية كهربا بالكامل ،البطارية بتتشحن عن طريق محرك بنزين.
-    تكنولوجيا الـe Force معناها 2 محرك كهرباء + محرك البنزين يعني عربية All Wheel Drive.
-    7 مقاعد ، حجمها أكبر من المتوسط
بس كده؟ لأ 
الاهم إنها ياباني 100 في المائة. وكلمة ياباني لوحدها تنقلك على طول لمقارنة مع الألماني ، لكن بما ان مفيش ألماني منافس تقريبا فاحنا قدّامنا سكودا كودياك بمحرك سعة 2 لتر ودفع كلي AWD، صحيح سوبارو فورستر ياباني ودفع كلي ومحرك 2 لتر برضه ، بس عشان الواقعية خلينا نقارن ولو بحاجات بسيطة مع كودياك  لأنها بتبيع كتير وعليها طلب وسعر اعادة مابعد البيع ماسك نفسه، صحيح الموضوع مش مقارنة وانما تجربة قيادة ، بس بعض النقاط ممكن تكون مفيدة.

فئة الـ7 مقاعد في سيارات الـSUV ..مقاعد صغيرة جدا

العربيتين7 مقاعد ، بس سيبك من حكاية الـ7 مقاعد ،  منها لله شركات السياحة لمّا بقت "تحط" كرسييين قلاب في شنطة تويوتا لاندكروزر عشان تدخل و"تتجمرك" اوتوبيس سياحي(10 مقاعد)..هوب بقت موضة، بس بقت كنبة بدل الكرسيين والكنبة دي يا دوب تاخد عيلين ست سنين وانت نازل مش طالع، وكمان لو واحد فيهم طويل مش ح يعرف يقعد.
خلينا نتفق ان الـ7 مقاعد بجد ، يبقى كرايسلر تاون اند كانتري أو باسيفيكا وانت مغمض ، بس وقتها محتاج شوية "فكّة" حلوين.

لمشاهدة وتحميل كتالوج نيسان اكستريل اضغط هنا

استهلاك الوقود في نيسان اكستريل.. هل هو ميزة رئيسية؟

لو انت مقرر تشتري نيسان اكستريل عشان توفر استهلاك بنزين فأحب أقولك ان حسبتك مش مظبوطة، لأن في حقيقة الامر إنت لا ح توفر ولا حاجة ، صحيح ممكن تقطع مسافة 1000 كيلومتر بتفويلة تانك واحدة (55 لتر)،لكن ممكن تحسبها بطريقة تانية، لو ده سبب شرائك نيسان اكستريل ، فانت ممكن تشتري عربية تانية SUV بسعر يقل مليون جنيه ،ومهما بلغ استهلاكك من البنزين ،فانت مش ح توفر اكتر من 250 الف جنيه بنزين في 10 سنين، يبقى كده في 750 ألف جنيه فرق ع الأقل.

مقارنة من حيث الحجم والأبعاد بين نيسان اكستريل وسكودا كودياك

يبقى نرجع تاني لنقطة الحجم ، وبحسب ابعادها فهي أقرب للمقارنة مع كودياك.. والجدول ده يوضحلك ابعاد السيارتين:

هنا تحس ان فعلا المقارنة بالنسبة للحجم مظبوطة ، لكن لو اتكلمنا عن المحرك ،فالمقارنة كأرقام لصالح اكستريل، مجربتش سكودا كودياك ، فعشان نكون منصفين حنتكلم عن اكستريل من حيث القوة والعزم.. وبالتأكيد الأداء ونظام التعليق(العفشة)، طبعا دفع كلي ، يعنى تدخل بيها مدقات وصحراء وانت مطمئن ، ولو صادفك شارع او طريق كله حفر ومطبات(موجود ياما في شوارعنا) حتعرف وح تحس فعلا يعني ايه AWD.
في تجربتي كان ولادي قاعدين في الكنبة الأخيرة، أو بشكل اكثر دقة قافلينها وقاعدين براحتهم،وسؤالي الدائم ليهم مع أي مطب او حفرة، حاسيين باهتزاز او "رجّة"؟ وكان الجواب دايما.. لأ.

وده يخليني أقول ان اهم مميزات اكستريل هو نظام التعليق ونعومة اجتياز اي عوائق في الطريق.

إقرأ أيضا للكاتب الصحفي اسلام حويلة :
"ترخيصها ب12 الف جنيه".. أهم 7 معلومات عن نيسان اكس تريل
 

طبعا مطلعتش صحرا عشان الـ الـe Force تشتغل بالـ Full Power، ونشوف الـ 195نيوتن.متر الإضافية مع الـ330 نيوتن.متر الطبيعية، انت متخيل عزم 525 نيوتن.متر، لكن أي عربية عادية راكب فيها 6 افراد ، تكييف شغّال ، طالع مطلع أكيد ح تحس بشوية ضعف في العزم، بدون مبالغة مع اكستريل مش حتحس بده خالص .. ولا الهوا.

العربية قوتها 211 حصان يعني انت راكب عربية مش مجرد حجم بموتور ضعيف (بطة) زي عربيات كتير منتشرة في مصر ، انت راكب وحش ماشي بيه مش قلقان، كمان تقدر تعمل “كيك داون” وانت على سرعة 90 كيلو والعربية"محملّة" هنا بس حتعرف الفرق بين الكهرباء والمحرك الـIce العادي.
 

الجدول ده يوضحلك مقارنة في الأداء بين اكستريل وكودياك

سعر نيسان اكستريل 

نيسان اكستريل ePower بتنزل مصر في فئتين الأولى بدون تكنولوجيا الـe Force وبـ5 مقاعد وسعرها 2 مليون و200 الف أما الفئة الأعلى بتكنولوجيا الـe Force وبـ7 مقاعد دفع كلي بسعر 2.5 مليون جنيه

خلاصة تجربة قيادة اكثر من 7 أيام مع نيسان اكستريل

متقدرش تقول ان ميزة نيسان اكستريل في حاجة معينة، هي باكدج على بعض، واخدة الـ24 قيراط كاملين، عزم وقوة ، دفع كلي، مساحة واسعة، ارتفاع عن الأرض، وسائل أمان متعدّش، عزل ممتاز ، وأهم نقطة هي الأداء، أداء السيارة الكهربائية، ورأيي لو التقييم من 10 درجات اجمالا فهي تاخد 7 من 10 درجات.

حتقولي ليه مش 10 على 10 .. في نقطة مهمة جدا حاولت بقدر الإمكان انها متأثرش على تقييمي ليها ، انا حرفيا نزلت من مرسيدس EQE SUV يادوب لفيت كام خطوة وركبت نيسان اكستريل.. انت متخيل يا مان عايش أيام مع الـ MBUX Hyperscreen والأداء العالي .. ومع ذلك كانت نيسان اكستريل مميزة فعلا.. وتقدر تقول انها مثالية.
بس ارجع للتقييم .. تقييمي لمرسيدس كان 8.5 من 10 درجات ، لانه ببساطة دايما حتفضل السيارة اللّي تاخد 10 من 10 لسة في خيال المصممين والمهندسين.

إقرأ أيضا للكاتب الصحفي اسلام حويلة :
"ترخيصها ب12 الف جنيه".. أهم 7 معلومات عن نيسان اكس تريل