جيلي في مصر بين أبوغالي موتورز وأوتو موبيليتي .. المسكوت عنه

تقريبا كل الميديا بلا استثناء بيحاولوا يتجنبوا الكتابة في موضوع أداء علامة جيلي في مصر، خصوصا وان في وكيلين بيتنافسوا على تحقيق أفضل أداء ومبيعات وبالتالي خدمة العميل.

موضوع الوكيلين في حالة جيلي جديد ع السوق المصري، ممكن يكون فيها شبه من حالة مرسيدس، لكن مكتب مرسيدس في مصر بيباشر العمليات بنفسه، من وضع استراتيجية، استيراد عربيات، تسويق، علاقات حكومية، تعامل مع الاعلام وغيره.

ممكن تقول انه في حالة مرسيدس هم أقرب للموزعين منهم للوكيل.

لكن الحالة هنا مختلفة، جيلي الصينية هي مسؤولة عن بعض الأمور زي التسعير، الضمان ،والوكيلين عليهم الاستيراد وتقديم خدمات ما بعد البيع "الإضافية" والتسويق والاعلام وغيره.

مثلا في حالة موديل ستارراي، تم تقديم العربية لأسواق أفريقيا من القاهرة،في حضور وكلاء جيلي المصريين ومن بعض دول أفريقيا،وتم ارجاء تقديمها في السوق المصري لبعد كده، وتم تحديد 9 يونيو للاطلاق، لكن هو مين ح يقدّم العربية؟

هل مسؤولو شركة جيلي الصينية حيقدموها في مؤتمر صحفي مثلا؟ هل سيكون الوكيلين في مصر ع المنصة للاجابة على أسئلة الصحفيين؟

سهل جدا أقولك كلام نظرى عن التكامل بين الاثنين، والتعاون وبلا بلا بلا...

لكن الوضع على الأرض ان الوكيلين فتحوا باب الحجز عن العربية وعرضوها في صالات العرض، وكل وكيل دعا مجموعة من الاعلاميين لتفقدها ووضع رأي فيها، بدون الاعلان عن الأسعار اللّي مفترض يتم اعلانها يوم 9 يونيو.

طبعا مفيش حفل لتدشين العربية كالمعتاد، تدشين بعد ايه؟ ما العربية اتشافت واتعرضت واتنشر كل مواصفاتها صوت وصورة

كمان مش منطقي ان الوكيلين يبعتوا أخبار واحدة مختلف فيها اسم الوكيل بس، انا كجهة نشر الطبيعي انى انشر خبر واحد واضيف اسم الوكيلين، أو احذف اساميهم واقتصره على جيلي، وده مش منطقي

في الحقيقة ان في تنافس شديد جدا بين الوكيلين، وفي "عركة" على الاستحواذ على الجزء الأكبر من المبيعات، السوق من وقت ما "نشرت" خبر تعاقد جيلي مع اوتوموبيلتي (وقتها مكانش لسة في اسم للشركة) رغم تعاقده مع ابوغالي موتورز تقريبا كله بلا استثناء كان بيتكلم عن التجربة الجديدة وان ازاي حتشتغل وتنجح، وتقريبا كل السوق في البداية اعتقد ان كل وكيل حيشتغل في جزء من الموديلات، خاصة ان جيلي عندها موديلات كتير جدا، وأغلب ظن السوق كان ان ابوغالي موتورز حتشتغل في المستورد واوتوموبيلتي حتشتغل تجميع محلي وكهرباء، رغم ان جيومتري C الكهربا تم تقديمها بالفعل.

ومفيش بالمناسبة المرة دي ونكمل بكرة الكلام