اسلام حويلة يكتب : ورطة ستلانتيس بسبب تصريحات تافاريس

الأخ كارلوس تافاريس رئيس مجموعة ستيلانتيس طلع من يومين وقال تصريحات مثيرة جدا ، قال في بودكاست لتلفزيون بلومبرج بالنص : "إذا لم يكسبوا المال، فسنغلقهم. "لا يمكننا أن نمتلك علامات تجارية لا تجني المال ، "العلامات التجارية موجودة هنا للاستفادة منها، "إذا لم يتمكنوا من تسييل القيمة التي يمثلونها، فسوف يتم اتخاذ القرارات".

طبعا كلام صعب يتقال ع الهوا وفي قناة عالمية جميع وسائل الاعلام متابعاها وبتنقل اخبارها عنها، هو يا دوب قال الكلمتين دول والميديا اشتغلت ، سابت الأربعين دقيقة تحليل ورؤية وغيره، وكله اشتغل على العلامات الخسرانة اللي حتقفل لو استمرت الخسائر.

رؤساء العلامات ومديرنها تفاجأوا بسيل من المكالمات والأسئلة الل ي كلها بتدور في فلك ايه الموقف بعد اغلاق الشركة والغاء العلامة او بيعها؟

طبع ده يفكرنا على طول بالأخ ماركوس شيفر بتاع فولكس فاجن لمّا طلع من سنة برضه في مقابلة وقال سيات في طريقها للاغلاق وبلا بلا بلا.

واضطرت سيات تنزل بيان مش ممسوك بس تفهم منه ان شيفر على الله حكايته وده "نفر" كلامه مش صحيح.

وبالفعل ادارة مجموعة فولكس فاجن أخدت قرار باستمرار سيات زي ماهي ولغت اي تفكير في التوقف عن انتاج العربيات.

أزمة كبيرة طبعا حصلت لوكلاء ييجي 6 علامات على الأقل في العالم كله بسبب التصريحات دي، ستلانتس بتضم 14 علامة ، فانت متخيل كل وكيل يسمع او يقرأ ان استثماراته ممكن تروح في الوبا بقرار اغلاق او الغاء العلامة؟ده غير توقف المبيعات أو تأجيلها ع الأقل لغاية ما يتضح الموقف

ادارات ستلانتس في العالم كله طبعا نفت كلام تافاريس – بشكل غير رسمي- وأكدت استمرار كل العلامات في كل الأسواق حول العالم، وان المجموعة بتدعم جميع العلامات ومستمرة في هذا الدعم

العجيب ان ده الراجل رقم 1 في المجموعة ، يعني مش مجرد "نفر" يلاقوا حد يرجعوله يصحح الكلام وينفيه.

وكمان تافاريس 65 سنة صحيح شكله يدي على 50 بس، بس لسة الخرف والزهايمر بعيد عنه.

بالمناسبة.. كل اللي قاله نظريا وعلميا صحيح 💯😂 حتلاقيه في الكتب والنظريات الاقتصادية، بس الواقع حاجة تانية خالص