قريبا شيفروليه اوبترا الجديدة كليا في مصر .. "العتاولة" زادوا واحد

جنرال موتورز مصر والمنصور للسيارات في اجتماعات باستمرار بسبب التحضير لاطلاق موديل جديد ع السوق المصري ، او بمعنى أصح جيل جديد من السيارة شيفروليه أوبترا المجمعة محليا، او ممكن نقول نيو نيو أوبترا ، باعتبار ان الموديل النازل يعتبر الجيل الثالث في مصر.

واوبترا من العربيات اللي حققت انتشار كبير جدا في مصر، وسابت فراغ كبير في الفئة بتاعتها، خاصة ان حجمها كان اكبر بشكل ملحوظ من بقية الموديلات في فئتها، ودي كانت ميزة لها عن باقي المنافسين.

طبعا توقيتات طرح اوبترا الجديدة في السوق بيتوقف على تفاصيل كتير السوق كله عارفها، يكفى بس انك تعرف ان مفيش خطة واحدة اتنفذت بتوقيتاها خلال السنتين تلاتة اللي فاتوا.. ونأمل ان الوضع ده ينتهي قريب عشان كل مستثمر يبقى عارف راسه من رجليه.

الأمر الجيد ان العربية دي او الجيل ده تم انتاجه في 2023 يعني لولا بعض الاضطرابات اللي شهدها سوق السيارات كان ح يتم انتاجها بالتزامن مع الانتاج العالمي.

نرجع تاني لاوبترا الجديدة اللي مفيش تفاصيل رسمية عنها حتى الآن ، لكن هي بتنزل في الاسواق الخارجية بمحرك 1.5 لتر وناقل حركة مانيوال واوتوماتيك CVT مع تجهيزات أمان قياسية نقدر نتوقعها من وسائد هوائية وانظمة الـABS,EBD,ESP,HSA وحساسات ركن خلفية.

بالمناسبة.. عربيات كتير ممكن تنقدم في السوق، لكن عربيات قليلة هي اللي بتحقق انتشار ونجاح، وغالبا بيبقى ورا النجاح ده وكيل كبير.. يعني تقدر تقول ان عتاولة السوق زادوا واحد