اسلام حويلة يكتب : قراءة في حال سوق السيارات الفترة الجاية

جيتور X70

السيناريو الأقرب للتطبيق هو فتح الاستيراد 3 او 4 مرات في السنة وبكميات ضئيلة وبشروط محددة للاعتمادات البنكية ، ومع تصريح رئيس الوزاء بالاهتمام بتوطين الصناعة محليا ، ده يخلينا نتصور شكل السوق لو تم بالفعل تطبيق السيناريو ده.

اولا :

مفيش وكيل يعتمد على الاستيراد فقط حيقدر يكمل بالشكل الحالي، أغلب الظن حيعتمد استراتيجية جلوبال أوتو – وكيل BMW في مصر- بالاقتصار على صالات عرض خاصة بيه، وينهي التعاقد مع الموزعين أو على الأقل حيعتمد على 2 منهم وغالبا حيكونوا ذو ملاءة مالية ضخمة يساعدوه في تدبير الدولار ، جحا اولى بلحم طوره.

ثانيا:

طلبات توزيع كبيرة للوكلاء المصنعين ، وده بيحصل حاليا، كل موزع أو تاجر كبير عايز "يشبط" مع "مُصنّع" عشان يضمن استمرارية في شغله وفتح معارضه ، البعض "حيسيب" توزيعات هو فيها بالفعل لعلامات اوروبية.

ثالثا :

80% من المعارض اللي حضرتك بتشوفها حتقفل وجزء منهم حيقلب مستعمل ، لكن مش حيقدروا على دفع الايجارات الضخمة الشهرية، وبالتالي "باكية" في أي مكان رخيص ، والشغل اون لاين وسوشيال.

رابعا :

الشركات العملاقة في القطاع عشان تعظم الربح ليها وللموزع المعتمد، برضه ح تقلص شبكة الموزعين ، أو تعتمد سياسة النفس الطويل لانهاء العلاقة التعاقدية معه.. عربيتن في الشهر مثلا ، في مقابل ان مجموعة الموزعين "المكملين" حيبقى مطلوب منهم شغل اضعاف اللي بيحصل حاليا سواء صالات عرض حديثة او مراكز صيانة في مواقع جغرافية معينة.

خامسا :

لو حنتكلم على نسب الاستحواذ على مبيعات السوق، حنلاقي ان مجموعة غبور "حتبلع" سوق الملاكي ، حيكون عندها 10 موديلات تجميع ع الأقل من 4 علامات وفي فئات مختلفة.. ده غير المستورد ، أما المنافس الرئيسي المنصور للسيارات ،واضح انه شايف ده كويس وعشان كده بيشتغل بقوة في ملف التجميع سواء مع شريكه جنرال موتورز مصر أو منفرد بتجميع بعض موديلات MG وعلامة جديدة جاية في السكة .. اما نيسان مصر فأعتقد انه مع دخول موديل جديد في التجميع ، حيكون قادر على التواجد في المنافسة. طبعا جلوبال اوتو في حتة تانية خالص