خلّيك في جراند شيروكي L الجديدة .. نازلة في سبتمبر

شركة ستيلانتس أعلنت عن موعد تقديم السيارة جيب جراند شيروكي L الجديدة كليا واللي بيتم تجميعها بمصنع الـAAV في مصر ، بعد غياب طال انتظاره نظرا للظروف المتلاحقة التي اصابت الاقتصاد العالمي.

جيب جراند شيروكي من العربيات المرتبطة بالصناعة الوطنية ، بتتجمع عندنا من زمان.. من وقت ما كانت دايملروكرايسلر شركة واحدة وجراند شيروكي بتتجمع ، اتفضت الشراكة بينهم وبرضه بتتجمع، اشترتها فيات وفضلت زي ماهي ، ولما تحالف ستروين بيجو اندمج مع مجموعة فيات كرايسلر ، برضه بتتجمع. وده شيء كويس جدا انه رغم تعاقب الادارات من الماني لامريكي لايطالي لفرنساوي ، الا ان العربية دي فضلت مستمرة ، لانها ببساطة بتحقق مكسب كويس جدا للشركة وعليها طلب كبير.

سمير شرفان رئيس عمليات ستيلانتس بالشرق الأوسط وإفريقيا من حوالي 20 شهر ،وقّع مذكرة تفاهم مع رئيس الوزراء لزيادة الاستثمارات – عدّيها- وقال انه قبل نهاية 2023 ح يتم طرح العربية في السوق المصري، وده ضمن خطة Dare Forward 2030 اللي بتنتهجها ستلانتس للاستحواذ على النصيب الأكبر من المبيعات في الشرق الاوسط وافريقيا. صحيح زي ما قلنا حصل تأخير لظروف اقتصادية عالمية ومحلية ،لكن أخيرا ح تظهر للنور بشكل وتصميم جديد.

هو ايه Dare Forward 2030 ؟

انا لقيتها مكتوبة كده ،ده انت غلس غلاسة ، معناها باختصار ان ستلانتس يبقى ليها الريادة في الشرق الاوسط وافريقيا بحلول 2030 ، في المجال الصناعي والتجاري والمستدام وكده ، تفاصيلها شرحها يطول.

الجديد بقى سعادتك ان موديل L بيتجمع هنا ، وده 7 مقاعد ،ودي حاجة عظمة جدا، خاصة لو عرفت ان الفئة دي من السيارات(7Seats) بتنمو سنة ورا سنة ، وتحس انها حتبقى تريند خلال السنين الجاية.

ميزة جراند شيروكيL ان مفيش منافس ليها في مصر ، منافسينها فورد برونكو، تويوتا فوررانر، كيا تيلورايد وفولكسفاجن اطلس ودول كلهم محدش فيهم يستجري ينزل مصر، يمكن لاندروفر ديسكفرى لو نزلوا منها الـ7 مقاعد.

يبقى مفيش قدامها غير أودي Q7 مع انها اكبر كحجم وكسعة لترية، او تطلع لديناصورات زي BMW X7 او مرسيدس GLS.