اسلام حويلة يكتب : حتصنّع ليك مكان.. مش حتصنّع شوف مجال تاني

نيسان نافارا

حنقول تاني بس بشكل مختلف ، كل شركات السيارات الكبرى منتظرة الصدور الرسمي لاستراتيجية السيارات ، واللي حتحدّد بشكل نهائي وتام شكل القطاع خلال الفترة المقبلة.

الرسالة اللي وجهتها الدولة لقطاع السيارات خلال الفترة اللي فاتت بتقول وبشكل واضح لا لبس فيه : "حتصنّع ليك مكان مش حتصنّع شوف مجال تاني"

طيب سهلة ، الشركات "ح تعصر" على نفسها "لمونة" وتجيب خط انتاج لموديل في أي مصنع قائم والدنيا تمشي وتبقى حلوة.

لا يا حلو .. مش كده خالص، الاستيراد بعد كده حيبقى مرتبط بالاستراتيجية، يعني عشان تاخد مزايا وحوافز من ضمنها الاستيراد "بحساب" لازم تحقق الهدف المنشود من الاستراتيجية ، تعميق المكون المحلي ورفع نسبته أو انتاج كمي ضخم أو التصدير..

يعني مش فكرة اني أجمّع 1000 عربية في السنة واستورد على حسهم 5000 عربية.. خالص

طب هو السوق يستحمل كم السيارات المجمعّة محليا المنتظر؟

في الظروف الحالية؟ لأ طبعا

طب الشركات حتعمل ايه؟

بعيدا عن المنصور للسيارات ومجموعة غبور باعتبار انهما بوضعهما الحالي قادران على الاستفادة من الاستراتيجية ، وبعيدا عن نيسان مصر لأنها تقريبا الشركة الوحيدة المصدّرة، مفيش قدام بقية الشركات إلا الوصول مع الشركات الأم باتفاق ما يسمح بالتصدير.

وده أمر في منتهى الصعوبة حرفيا، نيسان بتعمل ده لأن المصنع والشركة مملوكين بالكامل لنيسان اليابانية ، وبالتالي سيدة قرارها، أما ان الشركة الأم تسمح لوكيل بالتصدير لسوق في دول تانية ، ما "جحا أولى بلحم طوره"، ما يصدّر هو.

طب ايه رأيكم في فكرة نقل خطوط انتاج كاملة من اوروبا لمصر وليكن من فولكسفاجن مثلا، هل هي فكرة مقبولة لينا وليهم ؟ همّا حيوقفوا صناعة سيارات الـice وبالتالي في فرصة للاتفاق معاهم لشراء الخطوط.